दिल्ली: देशाला हादरवून सोडणाऱ्या निठारी हत्याकांडातील (Nithari Case) मुख्य आरोपींपैकी एक (Delhi News) असलेल्या सुरेंद्र कोळीला अखेर सर्वोच्च न्यायालयाकडून दिलासा मिळाला आहे. मंगळवारी (11 नोव्हेंबर) सर्वोच्च न्यायालयाने त्याची क्युरेटिव्ह याचिका मंजूर करत त्याला तुरुंगातून मुक्त करण्याचा मार्ग मोकळा केला. तब्बल 18 वर्षांनंतर सुरेंद्र कोळी आता कारागृहाबाहेर येणार आहे. या निर्णयाने 2006 च्या निठारी हत्याकांडाची आठवण पुन्हा एकदा ताजी झाली असून पीडितांच्या कुटुंबीयांत संतापाचे वातावरण आहे.
सुरेंद्र कोळी आणि मोनिंदर सिंग पंढेर यांच्या निठारी गावातील घरामागे 29 डिसेंबर 2006 रोजी नाल्यात आठ मुलांचे सांगाडे सापडले होते. ही भयंकर घटना उघडकीस आल्यानंतर संपूर्ण देश हादरला होता. यानंतर पोलिस तपासात अल्पवयीन मुलींवर लैंगिक अत्याचार करून त्यांची निर्घृण हत्या करण्यात आल्याची धक्कादायक माहिती समोर आली होती. निठारी गावात या काळात भीतीचं सावट पसरलं होतं. “त्या दिवसांत कोणीही आपल्या मुलींना एकटं बाहेर जाऊ देत नव्हतं,” सर्व स्थानिक घाबरलेल्या मनःस्थितीत होते.
कोळीला या हत्यांपैकी एका प्रकरणात दोषी ठरवून फाशीची शिक्षा सुनावण्यात आली होती. 2011 मध्ये सर्वोच्च न्यायालयाने ही शिक्षा कायम ठेवली होती, तर 2014 मध्ये त्याची पुनर्विचार याचिका फेटाळली गेली. मात्र, जानेवारी 2015 मध्ये अलाहाबाद उच्च न्यायालयाने त्याच्या दया याचिकेवरील विलंबाचा दाखला देत मृत्युदंड हा जन्मठेपेत बदलला. त्यानंतर 2023 मध्ये अलाहाबाद उच्च न्यायालयाने कोळी आणि पंढेर या दोघांनाही अनेक प्रकरणांत निर्दोष मुक्त केलं.
सीबीआय आणि पीडित कुटुंबांनी या निर्णयाला सर्वोच्च न्यायालयात आव्हान दिलं होतं, मात्र 30 जुलै 2024 रोजी न्यायालयाने सर्व 14 याचिका फेटाळून टाकल्या. आता, सर्वोच्च न्यायालयाच्या न्यायमूर्ती बी. आर. गवई, सूर्यकांत आणि विक्रम नाथ यांच्या खंडपीठाने कोळीची क्युरेटिव्ह याचिका स्वीकारत त्याच्या सुटकेचा मार्ग मोकळा केला आहे.
सुरेंद्र कोळीला निठारीतील एकूण 12 प्रकरणांत निर्दोष मुक्तता मिळाली आहे, तर मोनिंदर सिंग पंढेर दोन प्रकरणांत सुटला आहे. कोळीच्या सुटकेनंतर पीडितांच्या कुटुंबीयांनी तीव्र नाराजी व्यक्त केली आहे. “आमच्या मुलांचा न्याय अजूनही अधांतरी आहे,” असं एका पीडित आईने माध्यमांशी बोलताना सांगितलं. दरम्यान, सीबीआय या निर्णयावर पुढील कायदेशीर पर्यायांचा विचार करत असल्याची माहिती मिळाली आहे.
