Nagpur Crime: नागपूर: नागपूर शहरातील नंदनवन परिसरात घडलेल्या गंभीर घटनेने परिसरात मोठी खळबळ निर्माण झाली आहे. भाड्याच्या खोलीत असलेल्या एका युवक आणि मुलीवर अज्ञात व्यक्तींनी जीवघेणा हल्ला केला. या हल्ल्यात बालाजी कल्याणी या पोलीस भरती तयारी करणाऱ्या युवकाचा मृत्यू झाला असून मुलगी गंभीर जखमी झाली आहे.
मिळालेल्या माहितीनुसार, मृत बालाजी हा नंदनवन परिसरात आपल्या मित्रासोबत भाड्याच्या खोलीत राहत होता. ही घटना बुधवारी रात्री घडली. त्याची नातेवाईक असलेली मुलगी त्याला भेटायला आली होती. ते दोघेही खोलीत असताना हल्लेखोरांनी अचानक प्रवेश करून त्यांच्यावर जीव घेणा हल्ला केला अशी प्राथमिक माहिती पोलिसांनी दिली.
हल्ल्याच्या वेळी बालाजी याचा रूम मेट शेजारच्या खोलीत झोपण्यासाठी गेला होता. त्याने हल्ल्याचे आवाज ऐकून धाव घेतली असता बालाजी रक्ताच्या थारोळ्यात पडलेला दिसला, तर मुलगी गंभीर जखमी अवस्थेत होती. स्थानिकांच्या मदतीने दोघांना तातडीने रुग्णालयात नेण्यात आले; मात्र बालाजीला डॉक्टरांनी मृत घोषित केले.
जखमी मुलगी ही बालाजीची नातेवाईक असल्याची पुष्टी झाली आहे. हा हल्ला कोणत्या हेतूने करण्यात आला आहे याच कारण अद्याप स्पष्ट झालेले नाही. शवविच्छेदन अहवाल आणि मुलीचा जबाब मिळाल्यानंतर या प्रश्नांची उत्तरे स्पष्ट होणार असल्याचे पोलिसांनी सांगितले.
नंदनवन पोलीस ठाण्याच्या पथकाकडून घटनास्थळी पंचनामा करण्यात आला असून, तांत्रिक तपासाच्या आधारे हल्लेखोरांचा शोध सुरू आहे. परिसरात तणावाचे वातावरण वाढले आहे.
