नाशिक : नाशिकमध्ये एक धक्कादायक घटना घडली आहे. राहते घर विकण्याच्या वादातून धाकट्या भावाने थोरल्या भावाच्या डोक्यात दगडी वरंवटा घालून निर्घृण हत्या केल्याची घटना घडली आहे. ही घटना रामदास स्वामीनगर भागात घडली. याप्रकरणी पोलिसांनी संशयितास ताब्यात घेतलं असून उपनगर पोलीस ठाण्यात खुनाचा गुन्हा दाखल करण्यात आला आहे.
पोलिसांनी दिलेल्या माहितीनुसार, मयंक चंद्रकांत जाधव (वय ३४, रा. मानस अपा. रामदास स्वामीनगर) असे मृत युवकाचे नाव आहे. पोलिसांनी त्याचा लहान भाऊ संशयित आकाश चंद्रकांत जाधव (वय ३२) यास अटक केली आहे. जाधव बंधू त्यांच्या आईसमवेत रामदास स्वामीनगर येथील मानस अपार्टमेंटमध्ये वडिलोपार्जित घरात एकत्रित राहतात. धाकला भाऊ आर्थिक अडचणीत सापडल्याने त्याने राहते घर विकण्याचा तगादा लावला होता. त्यातूनच ही हत्या झाली असल्याची महती पोलिसांनी दिली.
वडिलोपार्जित घर विक्री करण्यास मयंकचा विरोध होता. त्यामुळे दोघांमध्ये सतत बाद होत होते. ११ डिसेंबरला देखील सकाळपासून या दोघांमध्ये वाद सुरू होते. यामध्ये झालेली शाब्दिक चकमक हाणामारीपर्यंत पोहोचली. या हाणामारीत संतप्त आकाशच्या हाती वजनी धारदार वस्तू लागल्याने त्याने मोठ्या भावाच्या डोक्यात प्रहार केला. घाव वर्मी लागल्याने मयंक जागीच कोसळला.(murder case nashik )
