पुणे : आगामी स्थानिक स्वराज्य संस्थांच्या निवडणुकीसाठी सर्वच राजकीय पक्षांनी जोरदार मोर्चेबांधणी सुरू केली आहे.अशातच पुण्यात या निवडणुकांच्या पार्श्वभूमीवर राष्ट्रवादी काँग्रेसमध्ये फेरबदल होण्याची शक्यता आहे. विद्यमान शहराध्यक्ष दीपक मानकर यांनी खोटे कागदपत्रे सादर केल्याप्रकरणी राजीनामा दिल्याने त्यांच्या जागी आता कोणाची वर्णी लागणार याकडे सर्वांचे लक्ष लागलं आहे. याबाबत मुंबईमध्ये राष्ट्रवादी काँग्रेसच्या बैठकीत पुणे शहराध्यक्षपदाबाबत खलबते झाल्याची माहिती समोर आली आहे
याबाबत मिळालेल्या माहितीनुसार, मुंबईमध्ये झालेल्या राष्ट्रवादी काँग्रेसच्या बैठकीत दीपक मानकर यांच्यानंतर पक्षाचं शहरातील नेतृत्व कोणी करावं यावर सविस्तर चर्चा झाल्याची माहिती आहे. शहराध्यक्ष म्हणून माजी आमदार सुनील टिंगरे, हडपसरचे विद्यमान आमदार चेतन तुपे यांच्या नावाची सुद्धा चर्चा झाली आहे. तरी या सोबतच विद्यमान कार्याध्यक्ष प्रदीप देशमुख यांना बढती देता येईल का? यासंदर्भात देखील चर्चा झाली आहे. त्यामुळे पुणे राष्ट्रवादीचा शहराध्यक्ष निवडण्यासाठी मुंबईत जोरदार खलबतं सुरू आहेत.
राष्ट्रवादीचे विद्यमान शहराध्यक्ष दीपक मानकर यांनी पक्षाकडे आपल्या पदाचा राजीनामा सुपूर्द केला आहे. त्यानंतर आता पुणे राष्ट्रवादीची कमान कोणाच्या खांद्यावर असणार? दीपक मानकर यांचा राजीनामा पक्ष स्वीकारणार का? याकडे शहराचे लक्ष लागलं आहे.
