पुणे : महाराष्ट्र नवनिर्माण सेनेचे अध्यक्ष राज ठाकरे यांनी मराठी भाषेच्या मुद्द्यावरून मनसेच्या पदाधिकाऱ्यांना सक्रिय होण्याचा इशारा दिला आहे. आता मनसे पदाधिकाऱ्यांनी विविध बँकांच्या भेटी घेऊन मराठीची भाषेचा वापर करण्याबद्दल तंबी दिली आहे. या पार्श्वभूमीवरच आता पुण्यातील बँकांना मनसेकडून अल्टिमेट देण्यात आला आहे.
मनसे अध्यक्ष राज ठाकरे यांनी गुढीपाडव्याच्या मेळाव्यात मराठी भाषा आणि मराठी अस्मिता यावर वक्तव्य केलं. महाराष्ट्रातील प्रत्येक बँकेत मराठी वापरले जाते का नाही हे चेक करा,प्रत्येक आस्थापनेत ही बाब तपासून पहा असे आदेश आपल्या मनसे पदाधिकाऱ्यांना त्यांनी दिले.त्यानुसार आज पुण्यातील मनसे सैनिकांनी बँकेची तपासणी केली. बँकांना निवेदन देऊन बँकेचे पूर्णपणे व्यवहार मराठी करण्यासाठी आठ दिवसांची मुदत देण्यात आली आहे. जर आठ दिवसांनी संपूर्ण व्यवहार मराठीत नाही केला तर मनसे स्टाईलने गाल रंगवत खळ खट्याक निघतील असा इशारा मनसे कार्यकर्त्यांनी दिला आहे. मनसे पुणे शहर अध्यक्ष साईनाथ बाबरांच्या नेतृत्वाखाली आज मनसैनिकांनी बँकांमध्ये जाऊन निवदेन दिलं आहे.
मनसेकडून बँका आणि अन्य संस्थांना मराठीत व्यवहार करण्याचे निर्देश देण्यात आले असून चारकोपमध्ये बँकेला नोटीस देण्यात आली आहे तर पुण्यात आयसीआयसीआय बँकेवर कारवाई करण्यात आली आहे. तसेच पत्रव्यवहार मराठीत झाले पाहिजेत आणि मराठी भाषेचा व मराठी माणसाचा अपमान कुठेही झाला नाही पाहिजे असा इशाराच त्यांनी दिला आहे.
