मुंबई : वसई-विरार परिसरातील नालासोपारा येथील अचोळे भागामध्ये एक अत्यंत दुर्दैवी दुर्घटना घडली. वसई-लिंक रोडवर असणाऱ्या ‘इंपिरियल हाईट्स’ या 14 मजली इमारतीला मंगळवारी रात्री उशिरा भीषण आग लागली. या भयानक आगीत 2 महिलांचा दुर्दैवी मृत्यू झाला असून, जवळपास चार मजले पूर्णपणे जळून खाक झाले आहेत.
मिळालेल्या माहितीनुसार, मंगळवारी रात्री 11 ते 11.30 च्या सुमारास इमारतीच्या 10 व्या मजल्यावर अचानक शॉर्ट सर्किट झाले. पाहता पाहता या ठिणगीचे रूपांतर मोठ्या आगीत झाले आणि आगीच्या प्रचंड ज्वालांनी वेगाने पसरत 19 व्या मजल्यासह जवळपासचे चार मजले आपल्या विळख्यात घेतले. या आगीच्या दुर्घटनेत फाल्गुनी शाह आणि अश्विनी पारकर या दोन महिलांचा मृत्यू झाला असून काही नागरिक गंभीर जखमी झाले आहेत.
मध्यरात्री अचानक घडलेल्या या घटनेमुळे इमारतीमधील रहिवाशांमध्ये एकच भितीचे वातावरण पसरले. जीव वाचवण्यासाठी अनेकांनी धावपळ सुरू केली, तर काहींनी गॅलरीतून एका मजल्यावरून दुसऱ्या मजल्यावर जाण्याचा प्रयत्न केला. घटनेची माहिती मिळताच वसई-विरार आणि मीरा-भायंदर महानगरपालिकेच्या अग्निशमन दलाच्या गाड्या तातडीने घटनास्थळी दाखल झाल्या. जवानांनी अथक प्रयत्न करत तब्बल 6 तासांनंतर आगीवर पूर्णपणे नियंत्रण मिळवले.
या कारवाईदरम्यान इमारतीत अडकलेल्या 30 ते 40 रहिवाशांना सुरक्षित बाहेर काढून जवळच्या एका हॉलमध्ये हलवण्यात आले.
या भीषण दुर्घटनेमुळे संपूर्ण परिसरात हळहळ व्यक्त केली जात असून शॉर्ट सर्किटसारख्या कारणांमुळे सुरक्षिततेचा प्रश्न पुन्हा एकदा ऐरणीवर आला आहे.
