Malegao case : मालेगाव तालुक्यातील डोंगराळे गावात तीन वर्षांच्या चिमुकलीवर झालेल्या अमानुष अत्याचारानंतर तिची निर्घृण हत्या झाल्याच्या घटनेने संपूर्ण परिसर संतापून उठला आहे. या प्रकरणातील आरोपीला तात्काळ फाशीची शिक्षा द्यावी, या मागणीसाठी विविध सामाजिक संघटनांनी आज मालेगाव शहरात ‘जनआक्रोश मोर्चा’ काढला. सकाळपासूनच हजारो नागरिक रस्त्यावर उतरले होते. पीडित बालिकेला न्याय मिळावा, आरोपीला कठोरात कठोर शिक्षा व्हावी या एकाच घोषणांनी मालेगाव दणाणून गेला. Malegao case
तणाव शिगेला : पोलिसांकडून लाठीचार्ज
मोठ्या पोलीस बंदोबस्तात निघालेला हा मोर्चा दुपारी मालेगाव न्यायालयाच्या परिसरात पोहोचला. मात्र तणाव पूर्णपणे शिगेला पोहोचला, जेव्हा संतप्त जमावाने कोर्टाबाहेर तीव्र घोषणाबाजी सुरू केली. सततच्या भावनांच्या उद्रेकामुळे जमाव नियंत्रणाबाहेर जाण्याची परिस्थिती निर्माण झाली. याच दरम्यान काही आंदोलकांनी थेट कोर्टाच्या कंपाऊंडवर चढण्याचा, तसेच आतमध्ये शिरण्याचा प्रयत्न केला. नागरिकांच्या रोषाला थोपवण्याचा पोलिसांचा प्रयत्न अपुरा पडत असल्याचे लक्षात येताच अखेर पोलिसांनी बळाचा वापर केला. जमावाला पांगवण्यासाठी पोलिसांनी लाठीचार्ज सुरू केला. लाठीचार्जदरम्यान काही जणांना किरकोळ दुखापती झाल्याचे समजते.
लाठीचार्जनंतर मोठा जमाव पांगला असला तरी अनेक नागरिक अजूनही कोर्टाच्या बाहेर ठिय्या देऊन बसले होते. “आरोपीला फाशी मिळेपर्यंत आंदोलन थांबणार नाही,” असा निर्धार नागरिकांनी स्पष्ट शब्दांत व्यक्त केला. परिसरात अजूनही पोलिसांचा कडक बंदोबस्त असून तणावपूर्ण शांतता पसरलेली आहे.
“मुलीला न्याय द्या”
डोंगराळे गावात घडलेली हृदयद्रावक घटना अद्यापही स्थानिकांच्या मनातून जात नाही. २४ वर्षीय आरोपीने पीडितेच्या वडिलांशी झालेल्या भांडणाचा राग मनात ठेवून चिमुकलीवर लैंगिक अत्याचार केल्याचे तपासात उघड झाले आहे. त्यानंतर केलेली तिची निर्घृण हत्या संपूर्ण समाजाला हादरवून टाकणारी आहे. पोलिसांनी आरोपीला अटक केली असून न्यायालयाने त्याला सात दिवसांची पोलीस कोठडी सुनावली आहे. पुढील तपास वेगाने सुरू असल्याचे पोलिसांनी सांगितले.
या घटनेमुळे मालेगाव शहर एकवटले असून समाजाच्या प्रत्येक घटकातून मुलीसाठी न्यायाची मागणी जोर धरत आहे. न्यायालयीन प्रक्रियेवर सर्वांचे लक्ष लागले असल्याने आरोपीला कठोर शिक्षा मिळावी, यासाठी नागरिकांची लढाई सुरूच राहणार आहे.
