राजेंद्र गुंड
Madha News : माढा, (सोलापूर) : माढा तालुक्यातील मानेगाव येथील सर्वसामान्य गरीब कुटुंबातील होतकरू विद्यार्थी संस्कृती हरिश्चंद्र मोटे व दीपक बापू गावडे यांचा सत्कार आमदार बबनराव शिंदे यांच्या हस्ते करण्यात आला. या दोघांनीही वैद्यकीय पात्रता परीक्षेत (NEET) अनुक्रमे 720 पैकी 678 व 660 गुण प्राप्त केले आहेत. त्यांच्या या यशाबद्दल त्यांचा आर्थिक मदत करत सन्मान करण्यात आला. (Madha News)
संस्कृती मोटे व दीपक गावडे या दोघांच्याही घरची आर्थिक परिस्थिती बेताची असल्याने जिल्हा दूध संघाचे चेअरमन रणजितसिंह शिंदे व मानेगाव येथील नेतेमंडळी आणि ग्रामस्थांच्या विनंतीवरून आमदार बबनराव शिंदे यांनी पुढील वैद्यकीय शिक्षणासाठी मदत म्हणून प्रत्येकी 50 हजार अशी 1 लाखाचे सहकार्य केले आहे. मतदारसंघातील गोरगरीब, गरजू व होतकरू विद्यार्थ्यांना मदत करण्याची भूमिका आमदार बबनराव शिंदे यांनी घेतल्याबद्दल या दोघांच्या कुटुंबियांनी व ग्रामस्थांनी त्यांचे आभार मानले. (Madha News)
यावेळी बोलताना आ. बबनराव शिंदे म्हणाले की, ग्रामीण भागातील विद्यार्थ्यांनी प्रतिकूल परिस्थितीवर मात करून प्रामाणिक कष्ट जिद्द आणि चिकाटीच्या जोरावर वैद्यकीय पात्रता परीक्षेत मिळवलेले यश हे कौतुकास्पद आणि प्रेरणादायी आहे. या दोघांनीही आईवडिलांच्या कष्टाचे चीज केले असून, भविष्यात ते नक्कीच डॉक्टर होण्याचे स्वप्न साकार करतील अशी अपेक्षा व्यक्त केली. तसेच या दोन्ही यशस्वी विद्यार्थ्यांचा आदर्श इतरांनी घ्यावा, असेही त्यांनी सांगितले. (Madha News)
यावेळी जिल्हा दूध संघाचे चेअरमन रणजितसिंह शिंदे, मानेगावचे नेतेमंडळी, ग्रामस्थ व मोटे आणि गावडे कुटुंबातील सदस्य उपस्थित होते.
