Loni kalbhor लोणी काळभोर, ता. 24 : “नर्सरी व्यवसायात मोठा नफा मिळेल” असे गोड बोलून विश्वास संपादन करत एका व्यावसायिकाकडून तब्बल चार लाखांची फसवणूक केल्याची घटना घडली आहे. ही घटना लोणी काळभोर परिसरात घडली असून सोरतापवाडी (ता. हवेली) येथील दाम्पत्यवर गुन्हा दाखल करण्यात आला आहे. Loni kalbhor
किशोर लक्ष्मण साठे (वय अंदाजे 35) आणि अर्चना किशोर साठे (वय अंदाजे 26) अशी गुन्हा दाखल करण्यात आलेल्यांची नावे आहेत. याप्रकरणी महेंद्र बाबू जैनजांगडे (वय 39,रा. सिद्राम मळा, रामदरा रोड, लोणी काळभोर) यांनी लोणी काळभोर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, महेंद्र जैनजांगडे हे साईबाबा मंदिराशेजारी ‘फ्रस्टी डिलाईट’ नावाचे केक शॉप चालवतात. त्यांच्या ओळखीतील किशोर साठे याने ऑक्टोबर 2025 मध्ये नर्सरी व्यवसाय सुरू करण्याचा प्रस्ताव मांडला होता. “तुमच्या पत्नीला नर्सरीचा अनुभव आहे, त्यामुळे हा व्यवसाय फायदेशीर ठरेल,” असे सांगत साठे याने वारंवार विश्वासात घेतले. Loni kalbhor
साठे यांच्या बोलण्यावर विश्वास ठेवला. आणि जैनजांगडे यांनी 1 नोव्हेंबर 2025 रोजी दोन लाख रुपये बँकेच्या चेकद्वारे आणि दोन लाख रुपये रोख स्वरूपात साठे याला दिले. त्यानंतर काही दिवसांत व्यवसाय सुरू करू, असे आश्वासन देण्यात आले होते. मात्र, दिवसेंदिवस वेळ काढत साठे नर्सरी सुरू करण्याबाबत टाळाटाळ करत राहिला. पैसे परत मागितल्यावर साठे याने डिसेंबर 2025 मध्ये 2 लाख 20 हजार रुपयांचा चेक दिला, मात्र तो बँकेत जमा केल्यानंतर बाऊन्स झाला. याशिवाय एक कोरा चेकही दिला होता. यानंतर साठे याचा संपर्क पूर्णपणे तुटला. Loni kalbhor
या प्रकरणाची चौकशी करताना साठे याने एकट्या जैनजांगडे यांनाच नव्हे, तर परिसरातील इतर अनेक नागरिकांनाही वेगवेगळ्या व्यवसायांचे आमिष दाखवून लाखो रुपयांची फसवणूक केल्याचे समोर आले आहे. फकिर इनामदार, परविंदर दिगवा, लकी दिगवा, बाळासाहेब म्हेत्रे यांच्यासह इतर काही जणही या घोटाळ्याचे बळी ठरल्याची माहिती समोर आली आहे. गेल्या दोन महिन्यांपासून किशोर साठे व त्याची पत्नी अर्चना साठे यांचे मोबाईल बंद असून, ते पुणे शहर सोडून फरार झाल्याची माहिती समोर आली आहे.
या प्रकरणी किशोर साठे आणि अर्चना साठे या दोघांविरोधात लोणी काळभोर पोलीस ठाण्यात भारतीय न्याय संहिता (BNS) 2023 अंतर्गत कलम 3(5), 318(4) नुसार गुन्हा दाखल करण्यात आला आहे. दोघेही सध्या फरार असल्याने पोलिसांकडून शोधमोहीम सुरू करण्यात आली आहे. Loni kalbhor
