लहू चव्हाण
पाचगणी : प्रर्यटननगरी पाचगणी (ता.महाबळेश्वर) येथील टेबल लॅंन्ड कॉर्नरवर जीवन प्राधिकरणाच्या जलवाहिनीतून गेली अनेक दिवसांपासून गळती सुरू असून हजारो लिटर पाणी वाया गेले आहे. याबाबत संबंधित अधिकाऱ्यांच्या निदर्शनास आणून देवूनही दररोज हजारो लिटर पाणी स्त्यालगतच्या गटारातून वाहून जात आहे. नागरिकांच्या दृष्टीने पाणी महत्त्वाचे असले तरी जीवन प्राधिकरणाच्या बेजबाबदार अधिकाऱ्याला पाण्याचे महत्त्व नसल्याचे दिसून येत आहे. असा सूर पाचगणीतील नागरिकांनी धरला आहे.
पाचगणीतील टेबल लॅंन्ड पठारावरील पावसाच्या पाण्यासाठी गटाराचे काम सुरू असून रस्त्याच्या कडेला जेसीबीच्या साहाय्याने खोदकाम करण्यात आले आहे. यामध्ये मोठ मोठ्या पाईप टाकण्यात आल्या आहेत. सदर काम करत असताना प्राधिकरणाची जलवाहिनी गेली दहा ते बारा दिवसांपासून फुटली आहे. हजारों लिटर पाणी वाया जात असतानाही जीवन प्राधिकरणाच्या अधिकाऱ्यांचे याकडे सपशेल दुर्लक्ष आहे.
पाचगणीकरांच्या या प्रश्नांचा आपला काहीही संबंध नसल्यासारखे प्राधिकरणाचे अधिकारी निवांत आहेत. अधिकाऱ्याच्या नियोजन शुन्य व बेजबाबदारपणाचा फटका पाचगणीकरांना बसत असूनप्राधिकरणाच्या हलगर्जीपणामुळे पाचगणीत पाण्याचा अपव्यय होत आहे. प्राधिकरणाच्या भोंगळ कारभारामुळे पाचगणीकरांना पाण्यासाठी संघर्ष करावा लागत आहे.
पाण्याचा होत असलेला अपव्यय पाहून याला कोणी वाली आहे की नाही? असा संतापजनक सवाल नागरिकांकडून विचारला जात आहे.
दरम्यान, जीवन प्राधिकरणाच्या जलवाहिनीतून अनेक ठिकाणी फुटली आहे. यामधून पाण्याची गळती गळती होऊन हजारों लिटर पाणी वाया जात आहे. संबधित अधिकाऱ्यांना कल्पना देऊनही अधिकारी डोळेझाक करत आहेत. अधिकाऱ्यांचा हा बेजबाबदारपणा प्रशासनाला व शासनाला कधी कळणार आहे. याकडे पाचगणी करांचे लक्ष लागून राहिले आहे.
