बारामती : जुन्या भांडणाचा राग मनात धरून दोघांनी मिळून एका कॉम्प्युटर व्यवसायीकाला मारहाण करून गंभीर दुखापत केल्याची घटना घडली आहे. बारामती शहरातील विघ्नहर्ता चहा या हॉटेल समोर देशमुख चौक येथे बुधवारी दुपारी तीन वाजण्याच्या सुमारास ही घटना घडली आहे. याप्रकरणी दोघांवर बारामती शहर पोलीस ठाण्यात गुन्हा दाखल करण्यात आला आहे.
सोन्या उर्फ सौरभ बाबुराव जाधव व अंकुश आबाजी जाधव (रा. दोघे ब-हाणपुर गावात ता. बारामती) अशी गुन्हा दाखल करण्यात आलेल्या दोघांची नावे आहेत. तर दत्तात्रय बाळासाहेब गवळी (वय-43 धंदा-कॉम्प्युटर व्यवसाय रा. ब-हाणपुर, ता. बारामती) असे मारहाण झालेल्या कॉम्प्युटर व्यवसायीकाचे नाव आहे. याप्रकरणी गवळी यांनी दिलेल्या तक्रारीनुसार दोघांवर गुन्हा दाखल करण्यात आला आहे.
पोलिसांनी दिलेल्या माहितीनुसार, बुधवारी दुपारी तीन वाजण्याच्या सुमारास विघ्नहर्ता चहा हॉटेलसमोर आरोपी सौरभ उर्फ सोन्या जाधव आणि अंकुश जाधव यांनी जुन्या भांडणाचा राग मनात धरून गवळी यांना रस्त्यावर ओढून लाथाबुक्क्यांनी मारहाण केली.
यावेळी सौरभ जाधव याने लोखंडी गजाने डोक्यावर हल्ला करण्याचा प्रयत्न केला, मात्र फिर्यादीने प्रतिकार करताना उजव्या हातावर आणि करंगळीवर मार बसला. या हल्ल्यात त्यांची करंगळी फ्रॅक्चर झाली. झटापटी दरम्यान त्यांच्या खिशातील 3 हजार रुपये रोख रक्कम खाली पडली. जी सौरभ जाधवने उचलून घेतली. त्यानंतर दोघेही लाल-ग्रे रंगाच्या नंबर प्लेट नसलेल्या टीव्हीएस मोटरसायकलवरून पसार झाले.
दरम्यान, दत्तात्रय गवळी यांनी दिलेल्या तक्रारीनुसार बारामती शहर पोलीस ठाण्यात BNS 118(2), 324(4)(5), 303(2), 3(5) अंतर्गत दोघांवर गुन्हा दाखल करण्यात आला असून, पुढील तपास हवालदार खेडकर करीत आहेत.
