पुणे : महाराष्ट्राची महान सांस्कृतिक आणि आध्यात्मिक परंपरा असलेल्या आषाढी वारीचे पुण्यात मोठ्या उत्साहात स्वागत झाले आहे. संत ज्ञानेश्वर महाराज आणि संत तुकाराम महाराजांच्या पालख्या सध्या पुणेनगरीत विसावल्या आहेत. या सोहळ्यासाठी पुणे महानगरपालिकेने वारकऱ्यांच्या सेवेसाठी वाहतूक, आरोग्य, सुरक्षा आणि स्वच्छतेचे चोख नियोजन केल्याचे जाहीर केले होते. मात्र, याच दरम्यान एक संतापजनक आणि धक्कादायक प्रकार समोर आला असून, यामुळे प्रशासकीय दाव्यांवर प्रश्नचिन्ह निर्माण झाले आहे.
शहरातील गंजपेठ भागात वारीसाठी आलेल्या गरीब वारकऱ्यांची आर्थिक लूट केली जात असल्याचे उघडकीस आले आहे. गंजपेठेतील सोनवणे रुग्णालयाच्या समोरील पालिकेच्या शौचालयाचा वापर करण्यासाठी वारकऱ्यांकडून चक्क २०-२० रुपयांची मागणी केली जात आहे. खरं तर, महानगरपालिकेने वारकऱ्यांसाठी सर्व सार्वजनिक शौचालये मोफत उपलब्ध करून दिल्याचा दावा केला होता. परंतु, प्रत्यक्षात तेथील ठेकेदाराकडून वारकऱ्यांची अडवणूक करून पैसे उकळले जात आहेत.
एका सजग नागरिकाने या संपूर्ण प्रकाराचा व्हिडिओ मोबाईलमध्ये कैद करून तो सोशल मीडियावर व्हायरल केला आहे. या व्हिडिओमध्ये सुलभ शौचालयातील कर्मचारी वारकऱ्यांकडे पैशांची मागणी करताना स्पष्टपणे दिसत आहे. हा व्हिडिओ समोर आल्यानंतर राज्यभरातून आणि वारकरी संप्रदायातून तीव्र संताप व्यक्त होत आहे.
माऊलींच्या दर्शनासाठी शेकडो किलोमीटरची पायपीट करणाऱ्या गरीब आणि विठ्ठलभक्त वारकऱ्यांकडून अशा प्रकारे पैसे उकळले जात असल्याने प्रशासनाच्या कारभारावर प्रचंड टीका होत आहे. मनपाचे मोफत सुविधेचे दावे केवळ कागदावरच राहिले का, असा संतप्त सवाल आता नागरिक विचारत आहेत.
या गंभीर प्रकाराची दखल घेऊन पुणे महानगरपालिका प्रशासन दोषी ठेकेदारावर काय कारवाई करणार, याकडे सर्वांचे लक्ष लागले आहे.
