मांजरी : तुळजापूर येथे देवदर्शनासाठी नातेवाईकांसह निघालेल्या आयशर टेम्पोला मद्यधुंद अवस्थेतील व्हेन्यू कारचालकाने जोरदार धडक दिल्याने टेम्पो रस्त्यावर उलटला. या भीषण अपघातात महिला, पुरुष आणि लहान मुलांसह नऊ जण जखमी झाले. ही घटना गुरुवारी (ता. 12) रात्री दहाच्या सुमारास पुणे-सोलापूर महामार्गावर शेवाळवाडी येथील ग्रामसेवक प्रशिक्षण केंद्राजवळ घडली. मांजरी पोलीस ठाण्यात चालकावर गुन्हा दाखल करण्यात आला आहे.
राहुल नवसाजी पवार (रा. कदमवाकवस्ती, लोणी काळभोर) असे गुन्हा दाखल करण्यात आलेल्याचे नाव आहे. तर या अपघातात मिना मारुती धोट (वय 30 ), नंदिनी दिलीप लोहार (वय 16), सुनिता रमेश कळसे (वय 50, रा.सर्व काळेपडळ हडपसर पुणे), दिलीप मोतीलाल लोहार (वय 42), आशा दिलीप लोहार (वय 31), रुपेश दिलीप लोहार (वय 12), वैष्णवी मारुती धोट आणि दोन पुरुष व एक महिला जखमी झाली आहे. याप्रकरणी गणेश विलास खळदकर (वय 45, रा. हांडेवाडी, पुणे) यांनी मांजरी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, गणेश खळदकर हे आपल्या नातेवाईकांसह मिनी आयशर टेम्पोतून तुळजापूरला देवदर्शनासाठी निघाले होते. टेम्पोत एकूण 18 जण प्रवास करत होते. शेवाळवाडी परिसरात पोहोचले असताना पाठीमागून आलेल्या काळ्या रंगाच्या व्हेन्यू कारने डाव्या बाजूने ओव्हरटेक करत टेम्पोला जोरदार कट मारला. यावेळी कारची टेम्पोला धडक बसली. कारला वाचविण्याच्या प्रयत्नात चालकाने जोरात ब्रेक लावल्याने टेम्पोवरील नियंत्रण सुटले आणि टेम्पो दुभाजकावर चढून रस्त्याच्या डाव्या बाजूला उलटला. या अपघातात पाच महिला, दोन पुरुष आणि दोन मुले जखमी झाल्याचे फिर्यादीत नमूद आहे. जखमींना शिवम हॉस्पिटल, विश्वराज हॉस्पिटल आणि लोटस हॉस्पिटल येथे उपचारासाठी दाखल करण्यात आले.
दरम्यान, अपघातास कारणीभूत ठरलेल्या व्हेन्यू कारचालकाचे डोळे लाल होते, बोलताना तो अडखळत होता तसेच त्याच्या तोंडातून दारूचा उग्र वास येत होता, असा आरोप फिर्यादीने केला आहे. अपघातानंतर संबंधित चालक जखमींना मदत न करताच घटनास्थळावरून पळून गेला. मात्र, कारमध्ये मिळालेल्या वाहन परवाना आणि कंपनीच्या ओळखपत्रावरून चालकाची ओळख राहुल पवार अशी समोर आली.
या अपघातात आयशर टेम्पोचे एक लाख रुपयांहून अधिक नुकसान झाले असून, समोरील काच, केबिन, आरसे आणि मागील बॉडीचे नुकसान झाले आहे. याप्रकरणी गणेश खळदकर यांनी मांजरी पोलीस ठाण्यात तक्रार दिली असून, संबंधित कारचालकाविरुद्ध कायदेशीर कारवाईची मागणी केली आहे.
