लोणी काळभोर : पुणे–सोलापूर महामार्गावरील कवडीपाट (कदमवाकवस्ती, ता. हवेली) टोलनाक्याजवळ उभ्या असलेल्या कारला मद्यधुंद चालकाने भरधावपणे रिव्हर्स घेत धडक दिल्याची घटना घडली आहे. या अपघातात कारचे मोठे नुकसान झाले असून, सुदैवाने कोणतीही जीवितहानी झाली नाही. याप्रकरणी लोणी काळभोर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, रोहण बळीराम पवार (वय २८) हे आयटी क्षेत्रात नोकरी करत असून सध्या रामदरा मंदिर रोड, लोणी काळभोर येथे वास्तव्यास आहेत. १ ऑगस्ट रोजी रात्री हडपसरहून घरी परतत असताना, पहाटे सुमारे २.१५ वाजण्याच्या सुमारास वडिलांचा फोन आल्याने त्यांनी आपली मारुती सुझुकी स्विफ्ट (HP-12-E-9021) ही कार हिरा लॉज, लोणी टोलनाका येथील पार्किंगमध्ये उभी केली.
मोबाईलवर बोलण्यासाठी ते कारबाहेर येत असतानाच शेजारी उभी असलेल्या हुंडाई आय-२० (MH-12-KE-1876) या कारच्या चालकाने अचानक वाहन रिव्हर्स घेत त्यांच्या कारच्या डाव्या बाजूला जोरदार धडक दिली. या धडकेत स्विफ्ट कारचा दरवाजा आणि फेंडरचे मोठे नुकसान झाले.
घटनेनंतर रोहण पवार यांनी संबंधित चालकाला विचारणा केली असता त्याने आपले नाव ‘विलास’ असे सांगितले. त्याच्याशी बोलताना तो मद्यधुंद अवस्थेत असल्याचा संशय आल्याचे फिर्यादीने पोलिसांना सांगितले आहे.
दरम्यान, या अपघातात कोणतीही व्यक्ती जखमी झाली नसली, तरी वाहनाचे नुकसान झाले आहे. फिर्यादीच्या तक्रारीवरून लोणी काळभोर पोलिसांनी संबंधित चालकाविरुद्ध वाहतूक नियमांचे उल्लंघन करून निष्काळजीपणे वाहन चालविल्याप्रकरणी गुन्हा दाखल केला असून, पुढील तपास सुरू आहे.
