लोणी काळभोर : पुणे शहर पोलीस आयुक्तांनी भारतीय नागरिक सुरक्षा संहिता (BNSS) 2023 च्या कलम 163(3) अंतर्गत जारी केलेल्या आदेशाची अवहेलना करत भाडेकरूंची माहिती पोलीस ठाण्यात नोंदवली नसल्याप्रकरणी लोणी काळभोर परिसरातील तीन घरमालकांविरुद्ध लोणी काळभोर पोलीस ठाण्यात गुन्हे दाखल करण्यात आले आहेत. विशेष शाखेच्या पथकाने केलेल्या तपासणीत ही बाब उघडकीस आली.
वागसिंग, रोहिणी संजय वाघुले व दत्तात्रय बाबुराव खुणे अशी गुन्हा दाखल करण्यात आलेल्या घरमालकांची नावे आहेत. पोलिसांनी दिलेल्या माहितीनुसार, पुणे शहरात ४ जुलै ते १ सप्टेंबर २०२६ या कालावधीसाठी घरमालक, भाडेकरू आणि इस्टेट एजंट यांनी भाडेकरूंची माहिती संबंधित पोलीस ठाण्यात देणे बंधनकारक असल्याचे आदेश लागू आहेत. या आदेशाची व्यापक प्रसिद्धी करूनही काही घरमालकांनी त्याकडे दुर्लक्ष केल्याचे तपासात समोर आले.
विशेष शाखेच्या पथकाने लोणी काळभोर पोलीस ठाण्याच्या हद्दीत तपासणी केली असता, रोहिणी कॉम्प्लेक्स, लोणीगाव येथील घरमालक वागसिंग यांनी भाडेकरू सुरज अनुप गास्वामी यांची माहिती पोलीस ठाण्यात दिली नसल्याचे आढळून आले. त्याचप्रमाणे याच रोहिणी कॉम्प्लेक्समधील घरमालक रोहिणी संजय वाघुले यांनी भाडेकरू मिलिंद रावसाहेब शिंदे यांची माहितीही पोलिसांना दिली नव्हती.
याशिवाय, अष्टापुरमळा रोड, घोरपडेवस्ती येथील श्रीराम निवास बिल्डिंगचे घरमालक दत्तात्रय बाबुराव खुणे यांनी भाडेकरू कुणाल शामराव साळुंखे यांची माहिती लोणी काळभोर पोलीस ठाण्यात नोंदवली नसल्याचेही तपासात उघड झाले.
या तिन्ही प्रकरणांत घरमालकांनी पोलीस आयुक्तांच्या आदेशाची जाणूनबुजून अवज्ञा केल्याप्रकरणी भारतीय न्याय संहिता (BNS) कलम 223 अन्वये लोणी काळभोर पोलीस ठाण्यात स्वतंत्र गुन्हे दाखल करण्यात आले असून, पुढील तपास सुरू आहे.
पोलिसांनी सर्व घरमालकांना आवाहन केले आहे की, आपल्या घरात किंवा इमारतीत राहणाऱ्या प्रत्येक भाडेकरूची माहिती संबंधित पोलीस ठाण्यात वेळेत नोंदवावी. अन्यथा कायदेशीर कारवाईला सामोरे जावे लागेल.
