इंदूर: इंदूर येथील नवविवाहित जोडप्याचा मेघालयमधील हनिमूनचा स्वप्नवत प्रवास एका भयानक हत्याकांडात बदलला आहे. या धक्कादायक घटनेत, पत्नी सोनम रघुवंशीने प्रियकराच्या मदतीने पतीची हत्या केली आहे. पोलिसांनी दिलेल्या माहितीनुसार, सोनमचे इंदूरमधील तिच्या वडिलांच्या प्लायवूड फॅक्टरीमध्ये काम करणाऱ्या राज कुशवाहा याच्यासोबत प्रेमसंबंध होते. सोनम आणि राजा रघुवंशी यांचा ११ मे रोजी विवाह झाला होता. सोनमने तिचा प्रियकर राज कुशवाहा याच्यासोबत मिळून पती राजा रघुवंशीच्या हत्येचा कट रचला होता. सोनम नेहमीच ऑफिसला जायची इथेच दोघांमध्ये मैत्री झाली होती. राज कुशवाह सोनमपेक्षा 5 वर्षांनी लहान होता.
२३ मे रोजी मेघालयमधील हॉटेलमधून बाहेर पडल्यानंतर हे जोडपे बेपत्ता झाले होते. काही दिवसांनी राजाचा मृतदेह 2 जून रोजी वेईसावडॉन्ग तळ्याजवळ एका खोल दरीत सडलेल्या अवस्थेत सापडला होता. 9 जून रोजी सोनमने गाजीपूरमध्ये आत्मसमर्पण केले. सोनमने तिचा प्रियकर आणि भाड्याने घेतलेल्या मारेकऱ्यांच्या मदतीने हत्येचे अत्यंत काळजीपूर्वक नियोजन केले होते. दरम्यान, पोलिसांनी घटनेचा तपास करून आरोपींना अटक केली आहे. पत्नी सोनम रघुवंशी आणि तिच्या तीन साथीदारांना अटक केली असून
या प्रकरणातील चौथा आरोपी आनंदलाही अटक केली आहे. शिलॉन्ग पोलीस सोनमला ट्रांजिट रिमांडवर घेण्यासाठी गाजीपूर येथे गेले असून पोलीस आता या प्रकरणाचा सखोल तपास करत आहेत.
लग्नापूर्वीच्या प्रेमसंबंधाबद्दल सोनमची आई म्हणाली, ‘आम्हाला या प्रेमसंबंधाची माहिती नव्हती. लग्न दोन्ही कुटुंबांच्या इच्छेनुसार झाले. दोघेही एकत्र लग्नाच्या खरेदीला जायचे. दोघेही एकत्र बाहेर फिरायला जायचे. दरम्यान, सोनमने असे का केले याबद्दल पोलिस अधिक तपास करत आहे. पोलीस आता या हत्येमागील नेमके कारण आणि गुन्ह्यात प्रत्येक आरोपीची नेमकी काय भूमिका होती, याचा कसून तपास करत आहेत. या घटनेमुळे संपूर्ण देशात खळबळ उडाली आहे.
