छत्तीसगड: छत्तीसगडमधील दुर्ग जिल्ह्यातील भिलाई (crime news) परिसरात प्रेमसंबंधातून एक धक्कादायक हत्या प्रकरण उघडकीस आले आहे. प्रेयसीला भेटण्यासाठी तिच्या घरी गेलेल्या तरुणाची तिच्याच भावांनी निर्घृण हत्या केली. या घटनेनंतर परिसरात मोठी खळबळ उडाली आहे. पोलिसांनी तीन आरोपींना अटक केली असून, दोन आरोपी फरार आहेत आणि त्यांचा शोध सुरू आहे.
या घटनेत मृत्यू झालेल्या तरुणाचे नाव धीरज सरोज उर्फ विक्की (वय 25 वर्षे) असे आहे. पोलिसांनी दिलेल्या माहितीनुसार, धीरजचा त्याच परिसरात राहणाऱ्या एका तरुणीसोबत प्रेमसंबंध होता. घटनेच्या दिवशी तरुणीची आई घराबाहेर गेली होती, तर तिचा भाऊ सूरज कामावर होता. या संधीचा फायदा घेत धीरज प्रेयसीला भेटण्यासाठी तिच्या घरी गेला. तरुणीने त्याला येऊ नकोस असे सांगितले होते, तरीही तो तिच्या घरी गेला.
काही वेळाने सूरज अचानक घरी परतला आणि दोघांना एकत्र पाहून तो संतापला. त्याने तात्काळ आपल्या चुलत भावांना बोलावले आणि दरवाजा बंद करून धीरजला बेदम मारहाण केली. या मारहाणीदरम्यान धीरजच्या डोक्याला गंभीर दुखापत झाली आणि त्याचा जागीच मृत्यू झाला.
मृत तरुणाची आई शोभा सरोज यांनी पोलिसांकडे दिलेल्या तक्रारीत म्हटले आहे की, प्रेयसीनेच धीरजला घरी बोलावून घेतले होते आणि त्यानंतर तिच्या भावांनी मिळून त्याची हत्या केली. ती घटनास्थळी पोहोचली तेव्हा धीरज रक्ताच्या थारोळ्यात पडलेला होता, असेही त्यांनी सांगितले.
पोलीस अधिकारी हेम प्रकाश नायक यांनी सांगितले की, “धीरजची अत्यंत निर्दयपणे हत्या करण्यात आली आहे. या प्रकरणातील पाच संशयितांची ओळख पटली असून, तिघांना अटक करण्यात आली आहे. दोन आरोपी फरार आहेत आणि त्यांचा शोध सुरू आहे. प्राथमिक तपासात हे स्पष्ट झाले आहे की, धीरज प्रेयसीला भेटण्यासाठी तिच्या घरी गेला होता आणि तेथेच तिच्या भावांनी व नातेवाईकांनी त्याच्यावर हल्ला करून त्याचा खून केला.” या घटनेनंतर स्थानिकांमध्ये संतापाचे वातावरण निर्माण झाले असून, पोलिसांनी गुन्हा दाखल करून पुढील तपास सुरू केला आहे.
