Pune Crime पुणे, ता. 2 : किरकोळ वादातून घडलेल्या संतापजनक घटनेत एका मजुराचा निर्घृण खून करण्यात आल्याची घटना कोंढवा परिसरात उघडकीस आली आहे. दारू पिण्याच्या कारणावरून झालेल्या वादातून केटरिंग कामगाराने दगडाने डोक्यात वार करून तरुणाची हत्या केली. ही घटना ३० एप्रिल रोजी सायंकाळी ७ ते रात्री साडेअकराच्या दरम्यान आर.के. कॉलनी परिसरातील टेकडीजवळ कडुलिंबाच्या झाडाखाली घडली. कोंढवा पोलिसांनी आरोपीला बेड्या ठोकल्या आहेत. Pune Crime
मनिषकुमार महादेव पासवान (वय २२, रा. पंचशीलनगर, कोंढवा) असे मृत तरुणाचे नाव आहे. तर महादेव अर्जुन कांबळे (वय ३५, रा. स्वामी समर्थनगर, कात्रज-कोंढवा रोड) असे अटक करण्यात आलेल्या आरोपीचे नाव आहे. याप्रकरणी पोलीस उपनिरीक्षक शिवराज खराडे यांनी कोंढवा पोलीस ठाण्यात फिर्याद दिली आहे. Pune Crime
पोलिसांनी दिलेल्या माहितीनुसार, मनिषकुमार पासवान हा टेकडी परिसरात एकटाच बसून दारू पित होता. त्यावेळी आरोपी महादेव कांबळे तेथे आला आणि त्याने दारू मागितली. यावरून दोघांमध्ये वाद झाला. संतापाच्या भरात कांबळे याने जवळच असलेला मोठा दगड उचलून पासवानच्या डोक्यात जोरदार मारहाण केली. या हल्ल्यात पासवानचा जागीच मृत्यू झाला. Pune Crime
घटनेनंतर आरोपी तेथून फरार झाला. मात्र त्याने आपल्या भावाला घडलेला प्रकार सांगितल्याने पोलिसांना माहिती मिळाली. त्यानंतर कोंढवा पोलिसांनी तातडीने तपास सुरू करून आरोपीला अटक केली. या घटनेची माहिती मिळताच पोलीस उपायुक्त राजलक्ष्मी शिवणकर, सहाय्यक पोलीस आयुक्त नम्रता देसाई आणि पोलीस निरीक्षक दीपक करांडे यांनी घटनास्थळी भेट देत पाहणी केली. पुढील तपास पोलीस निरीक्षक दीपक करांडे करीत आहेत. Pune Crime
