पुणे : मराठा आरक्षणासंदर्भात भूमिका निश्चित करण्यासाठी राज्य सरकारने दिलेली मुदत संपत आली आहे. दिलेल्या मुदतीत या विषयावर अंतिम तोडगा निघावा, यासाठी भूमिका निश्चित करणे गरजेचे आहे. यासाठी छत्रपती संभाजीराजे यांनी पुढाकार घेतला आहे. राज्यातील सर्व लोकसभा आणि राज्यसभा खासदारांची संयुक्त बैठक येत्या सोमवारी (ता. १८) दिल्ली येथे आयोजित केली आहे.
मराठा आंदोलक मनोज-जरांगे पाटील यांनी मराठा समाजाला सरसकट कुणबी प्रमाणपत्र मिळावे, या मागणीसाठी उपोषण केले. यानंतर सरकारने मराठा समाजाला टिकणारे आरक्षण देण्यासाठी ठराविक मुदत दिली आहे. ही मुदत संपण्यापूर्वी या विषयावर राज्यातील सर्व खासदारांनी एकमताने संसदेत आवाज उठवावा, यासाठी छत्रपती संभाजीराजे यांनी पुढाकार घेतला आहे. राज्यातील सर्व लोकसभा आणि राज्यसभा खासदारांची संयुक्त बैठक येत्या सोमवारी (ता. १८) दिल्ली येथे आयोजित केली आहे. केंद्रीय मंत्री नितीन गडकरी आणि नारायण राणे तसेच राष्ट्रवादी काँग्रेसचे अध्यक्ष शरद पवार यांना या बैठकीचे निमंत्रण देण्यात आले आहे.
मराठा समाज आरक्षण मिळावे, ही अनेक वर्षांपासूनची मागणी आहे. यासाठी समाजाचा संघर्ष सुरू आहे. त्यासाठी मोर्चे, आंदोलन, उपोषणही सुरू आहे. मनोज जरांगे पाटील यांच्या मागणीला छत्रपती संभाजीराजे यांनीही पाठिंबा दर्शविला आहे. कायदेशीर प्रक्रियेची माहिती असल्याने त्यांनी यासाठी पुढाकार घेतला असून काही दिवसांपूर्वी त्यांनी राज्यातील सर्व खासदारांना पत्र पाठविले होते. संसदेच्या हिवाळी अधिवेशनात लोकप्रतिनिधी या नात्याने आवाज उठविण्याचे आवाहन त्यांनी पत्राद्वारे केले होते.
या पार्श्वभूमीवर सर्व खासदारांची दिल्ली येथे बैठकीचे आयोजन केले आहे. दिल्लीतील महाराष्ट्र सदन येथे ही बैठक होणार असून, या बैठकीस शरद पवार, नितीन गडकरी, नारायण राणे, रामदास आठवले, सुप्रिया सुळे यांनाही निमंत्रण देण्यात आले आहे. त्यामुळे खासदार या बैठकीला उपस्थित राहणार का, याबाबत उत्सुकता निर्माण झाली आहे.
