Chha. Sambhajinagar-Pune : पुणे आणि छत्रपती संभाजीनगर दरम्यान प्रवास करणाऱ्या लाखो प्रवाशांसाठी महत्त्वाची बातमी समोर आली आहे. अनेक वर्षांपासून चर्चेत असलेल्या पुणे-संभाजीनगर ग्रीनफील्ड एक्स्प्रेस वे प्रकल्पाला अखेर अर्थसंकल्पात मोठा आर्थिक आधार मिळाला आहे. राज्य सरकारने या महत्त्वाकांक्षी महामार्गासाठी तब्बल 14,886 कोटींच्या निधीची घोषणा केली असून त्यामुळे प्रकल्पाच्या कामाला प्रत्यक्ष गती मिळण्याचा मार्ग मोकळा झाला आहे. (Chha. Sambhajinagar-Pune)
काय आहे ग्रीनफील्ड एक्स्प्रेस वे?
प्रस्तावित एक्स्प्रेस वे हा सुमारे 245.9 किमी लांबीचा सहापदरी (6 lane) आधुनिक महामार्ग असेल. हा पूर्णपणे ग्रीनफील्ड प्रकल्प असल्याने नवीन मार्ग तयार केला जाणार आहे. त्यामुळे विद्यमान वाहतुकीवरील ताण कमी होऊन अधिक वेगवान आणि सुरक्षित प्रवास शक्य होईल.
हा प्रकल्प 2 टप्प्यांत पूर्ण करण्याचे नियोजन आहे.
- पहिला टप्पा: पुणे ते शिरूर – 53.4 किमी
- दुसरा टप्पा: शिरूर ते संभाजीनगर – 192.5 किमी
पहिल्या टप्प्याची निविदा प्रक्रिया आधीच पूर्ण झाली आहे आणि पुढील महिन्यात प्रत्यक्ष कामाला सुरुवात होणार असल्याचे सांगितले जात आहे. दुसऱ्या टप्प्यासाठी निधी मंजूर झाल्याने संपूर्ण मार्गाच्या उभारणीला आता गती मिळणार आहे.
प्रवासाची वेळ होणार निम्मी
सध्या पुणे ते संभाजीनगर प्रवासासाठी साधारण 5 ते 6 तासांचा वेळ लागतो. मात्र एक्स्प्रेस वे पूर्ण झाल्यानंतर हेच अंतर सुमारे 3 तासांत पार करता येणार आहे. त्यामुळे व्यापारी, उद्योगपती, विद्यार्थी आणि रोजच्या प्रवासासाठी या मार्गाचा वापर करणाऱ्या नागरिकांना मोठा दिलासा मिळणार आहे.
पुढील 5 वर्षांत प्रकल्प पूर्ण
नियोजनानुसार या प्रकल्पासाठी सुमारे 1 वर्ष भूसंपादन आणि प्रशासकीय प्रक्रियेसाठी लागणार आहे. त्यानंतर प्रत्यक्ष महामार्ग उभारण्यासाठी 4 वर्षांचा कालावधी निश्चित करण्यात आला आहे. म्हणजेच पुढील 5 वर्षांत हा आधुनिक एक्स्प्रेस वे वाहतुकीसाठी खुला होण्याची शक्यता आहे.
राज्याच्या विकासाला चालना
या महामार्गामुळे पुणे, नगर आणि संभाजीनगर या औद्योगिक व व्यापारी शहरांमधील संपर्क अधिक वेगवान होईल. मालवाहतूक सुलभ होऊन उद्योग, पर्यटन आणि व्यापाराला मोठी चालना मिळेल. त्यामुळे हा प्रकल्प केवळ प्रवास सोपा करणारा नाही, तर महाराष्ट्राच्या आर्थिक विकासासाठीही महत्त्वाचा टप्पा मानला जात आहे.
