मुंबई : कल्याण-डोंबिवली महानगरपालिकेच्या शास्त्रीनगर रुग्णालयातील डॉक्टर आणि वैद्यकीय कर्मचाऱ्यांना झालेल्या कथित मारहाण प्रकरणी मोठी कारवाई करण्यात आली आहे. याप्रकरणी उपमुख्यमंत्री एकनाथ शिंदे यांच्या शिवसेनेचे नगरसेवक रमेश म्हात्रे यांना पोलिसांनी बेड्या ठोकल्या आहेत.
काय आहे नेमके प्रकरण?
रमेश म्हात्रे यांच्या प्रभागातील एका गरोदर महिलेला उपचारासाठी शास्त्रीनगर रुग्णालयात आणले होते. मात्र, तेथील डॉक्टरांनी तिच्यावर उपचार न करता दुसऱ्या रुग्णालयात घेऊन जाण्यास सांगितले. यावरून संतापलेल्या नगरसेवक म्हात्रे आणि त्यांच्या कार्यकर्त्यांनी कर्तव्यावर असलेल्या डॉक्टरांना मारहाण केली, तसेच महिला डॉक्टरशी हुज्जत घालत अरेरावी केल्याचा आरोप आहे.
या घटनेनंतर रमेश म्हात्रे यांनी पत्रकार परिषद घेऊन दिलगिरी व्यक्त केली. मात्र, त्यांनी महिला डॉक्टरवर हात उचलल्याचा आरोप फेटाळून लावला. म्हात्रे म्हणाले, “आम्हाला बाळासाहेब ठाकरेंची शिकवण असून आम्ही महिलांचा आदर करतो. सीसीटीव्ही फुटेजमधील दृश्ये कॅमेरा अँगलमुळे तशी दिसत आहेत. ती महिला डॉक्टर माझ्या मुलीसारखी आहे. आम्ही बोलत असताना ती ऐकून न घेता सतत फोनवर बोलत होती, म्हणून मी केवळ तिच्या हातावर फटका मारला.”
या घटनेचा निषेध करत शिवसेनेचे खासदार डॉ. श्रीकांत शिंदे यांनी आक्रमक भूमिका घेतली आहे. “एक डॉक्टर म्हणून मला वैद्यकीय कर्मचाऱ्यांच्या कष्टाची जाणीव आहे. अत्यंत तणावाच्या परिस्थितीत डॉक्टर रुग्णसेवा करत असतात. कायदा हातात घेणाऱ्या कोणाचीही गय केली जाणार नाही.
दरम्यान या प्रकरणात दोषी असलेल्या कोणत्याही व्यक्तीला पक्ष पाठीशी घालणार नाही आणि त्यांच्यावर कडक शिस्तभंगविषयक कारवाई केली जाईल,” असे त्यांनी स्पष्ट केले. या प्रकरणी गुन्हा दाखल झाल्यानंतर पोलिसांनी तातडीने अटकेची कारवाई केली आहे.
