बारामती : तालुक्यातील पणदरे येथे घरातील झोपण्याच्या खोलीत ३० वर्षीय विवाहितेची हत्या झाल्याची धक्कादायक घटना शनिवारी सायंकाळी उघडकीस आली. वैशाली तानाजी पवार (वय ३०, रा. पणदरे) असे मृत महिलेचे नाव आहे. अज्ञात व्यक्तीने डोक्यात आणि चेहऱ्यावर अज्ञात हत्याराने मारहाण केल्यानंतर टॉवेलने गळा आवळून तिची हत्या केल्याचे पोलिसांकडे दाखल फिर्यादीत नमूद करण्यात आले आहे.
या प्रकरणी वैशाली पवार यांच्या सासू रंजना लक्ष्मण पवार (वय ५०, रा. खडकआळी, पणदरे) यांनी माळेगाव पोलीस ठाण्यात फिर्याद दिली आहे. त्यांच्या तक्रारीवरून अज्ञात व्यक्तीविरुद्ध गुन्हा दाखल करण्यात आला असून, पोलिसांकडून आरोपीचा शोध सुरू आहे.
पोलिसांनी दिलेल्या माहितीनुसार, वैशाली पवार या पणदरे गावच्या हद्दीतील त्यांच्या राहत्या घरातील झोपण्याच्या खोलीत होत्या. शनिवारी सायंकाळी पावणेसातच्या सुमारास अज्ञात व्यक्तीने अज्ञात कारणातून त्यांच्यावर हल्ला केल्याचा आरोप आहे. हल्लेखोराने त्यांच्या डोक्यात आणि चेहऱ्यावर हत्याराने मारहाण केली. त्यानंतर टॉवेलने गळा आवळून त्यांची हत्या केल्याचे प्राथमिक माहितीतून समोर आले आहे.
घटनेची माहिती मिळताच माळेगाव पोलिसांनी घटनास्थळी धाव घेत पाहणी सुरू केली. उपविभागीय पोलीस अधिकारी कदम यांनी शनिवारी रात्री साडेनऊपासून रविवारी पहाटे अडीच वाजेपर्यंत घटनास्थळी तपास केला. घटनास्थळावरील परिस्थिती आणि उपलब्ध पुराव्यांच्या आधारे पोलिसांकडून तपास सुरू आहे.
या हत्येमागील नेमके कारण अद्याप स्पष्ट झालेले नाही. तसेच वैशाली पवार यांची हत्या कोणी आणि कोणत्या कारणातून केली, याचाही उलगडा झालेला नाही. सहाय्यक पोलीस निरीक्षक कुलदीप संकपाळ या प्रकरणाचा तपास करीत आहेत. अज्ञात आरोपीचा शोध घेण्यासाठी पोलिसांकडून विविध शक्यता तपासल्या जात आहेत.
