बारामती : शहरातील सूर्यनगरी परिसरात एका १९ वर्षीय युवकाने स्वतःच्या डोक्यात पिस्तुलातून गोळी झाडून घेतल्याची धक्कादायक घटना घडली. अविष्कार अमोल ढोले असे या युवकाचे नाव आहे. गंभीर जखमी झाल्यानंतर त्याला उपचारासाठी प्रथम बारामतीतील पुण्यश्लोक अहिल्यादेवी होळकर शासकीय रुग्णालयात दाखल करण्यात आले. प्रकृती गंभीर असल्याने त्याला पुढील उपचारासाठी पुण्यातील ससून रुग्णालयात हलवण्यात आले. मात्र, उपचार सुरू असताना रविवारी सकाळी त्याचा मृत्यू झाला.
पोलिसांनी दिलेल्या माहितीनुसार, सूर्यनगरी येथील जयश्री अपार्टमेंटमध्ये शनिवारी दुपारी साडेतीन ते पावणेचारच्या सुमारास अविष्कारने स्वतःकडील पिस्तुलातून डोक्यात गोळी झाडून घेतली. घटनेनंतर त्याला तातडीने रुग्णालयात दाखल करण्यात आले. प्राथमिक उपचारानंतर त्याला पुण्यात हलवण्यात आले होते.
पोलिसांच्या प्राथमिक तपासात अविष्कारचे एका विवाहित महिलेसोबत प्रेमसंबंध असल्याची माहिती समोर आली आहे. या संबंधाची माहिती संबंधित महिलेच्या पतीला मिळाल्यानंतर अविष्कार मानसिक तणावात होता. त्यातून त्याने स्वतःवर गोळी झाडून घेतल्याची प्राथमिक माहिती पोलिसांकडून देण्यात आली आहे. मात्र, या घटनेमागील नेमके कारण आणि संपूर्ण परिस्थितीचा तपास अद्याप सुरू आहे.
या प्रकरणी बारामती तालुका पोलीस ठाण्यात मयत रजिस्टर क्रमांक ८५/२०२६ आणि भारतीय नागरिक सुरक्षा संहिता (BNSS) कलम १९४ अन्वये नोंद करण्यात आली आहे. घटनेत वापरलेले पिस्तुल अविष्कारकडे कुठून आले, त्याच्याकडे ते कसे पोहोचले आणि या घटनेमागे आणखी कोणते कारण किंवा व्यक्तीचा सहभाग आहे का, याचा तपास पोलिसांकडून करण्यात येत आहे.
घटनेनंतर बारामतीच्या सूर्यनगरी परिसरात खळबळ उडाली आहे. या प्रकरणी बारामती तालुका पोलीस पुढील तपास करीत आहेत.
