पुणे : पर्वती आणि सहकारनगर परिसरात शनिवारी पहाटे मद्याच्या नशेत तरुणांच्या टोळक्याने हातात धारदार शस्त्रे घेऊन धुमाकूळ घातल्याची घटना घडली. या टोळक्याने रस्त्याच्या कडेला उभ्या असलेल्या तब्बल १९ वाहनांची तोडफोड केली. वाहनांच्या काचा फुटण्याचा आवाज आणि आरोपींच्या आरडाओरड्यामुळे परिसरात काही काळ दहशतीचे वातावरण निर्माण झाले. या प्रकरणी पोलिसांनी दोन अल्पवयीन मुलांसह तिघांना ताब्यात घेतले आहे.
पोलिसांनी दिलेल्या माहितीनुसार, आरोपींनी सुरुवातीला पर्वती गावठाण परिसरात तीन वाहनांची तोडफोड केली. त्यानंतर त्यांनी सहकारनगरच्या दिशेने जात तळजाई परिसरातील लेन क्रमांक तीन, शेवटचा थांबा, स्मशानभूमी परिसर, राजमुद्रा सोसायटी आणि स्प्रिंग हिल सोसायटी परिसरातील रस्त्यावर उभ्या असलेल्या १६ वाहनांना लक्ष्य केले. हातातील धारदार शस्त्रांनी वाहनांची नासधूस करत आरोपी पुढे जात होते.
पहाटे वाहनांच्या काचा फुटण्याचा मोठा आवाज ऐकून स्थानिक नागरिक घराबाहेर आले. मात्र, नागरिक बाहेर येण्यापूर्वीच आरोपी तेथून पसार झाले. एका सतर्क नागरिकाने तातडीने पोलिस नियंत्रण कक्षाला घटनेची माहिती दिली. घटनेचे गांभीर्य लक्षात घेऊन पर्वती आणि सहकारनगर पोलिस ठाण्यांसह गुन्हे शाखेच्या पथकांनी तपास सुरू केला.
पोलिसांनी परिसरातील सुमारे ४० सीसीटीव्ही कॅमेऱ्यांचे फुटेज तपासले. त्याच्या आधारे आरोपींचा माग काढत पोलिसांनी अवघ्या काही तासांत दोन अल्पवयीन मुलांसह तिघांना ताब्यात घेतले. या प्रकरणी पर्वती आणि सहकारनगर पोलिस ठाण्यात दोन स्वतंत्र गुन्हे दाखल करण्यात आले आहेत. आरोपींनी हा प्रकार कोणत्या कारणातून केला, तसेच या घटनेत आणखी कोणी सहभागी होते का, याचा तपास पोलिसांकडून सुरू आहे.
