लोणी काळभोर : लग्नानंतर सुरुवातीचे काही महिने संसार सुरळीत चालल्यानंतर पतीसह सासू-सासरे व दीराने फ्लॅट खरेदीसाठी माहेरून तब्बल 10 लाख रुपये आणण्याचा तगादा लावला. पैसे आणण्यास नकार दिल्याने शिवीगाळ, मारहाण व मानसिक छळ करण्यात आल्याचा आरोप कदमवाकवस्ती येथील 23 वर्षीय विवाहितेने केला आहे. पैसे न दिल्यास मुलीला कायमची माहेरी घेऊन जा, असे सांगून घराबाहेर काढल्याचा आरोपही तिने केला आहे.
याप्रकरणी लोणी काळभोर पोलिस ठाण्यात पती संदेश नवनाथ वारे, सासू निर्मला नवनाथ वारे, सासरे नवनाथ वारे आणि दीर संकेत नवनाथ वारे यांच्याविरुद्ध भारतीय न्याय संहिता (बी एन एस), 2023 – 115(2),352,85 प्रमाणे गुन्हा दाखल करण्यात आला आहे.
पोलिसांनी दिलेल्या माहितीनुसार, पिडीता यांचा विवाह 2 मे 2024 रोजी संदेश नवनाथ वारे यांच्याशी हिंदू रितीरिवाजानुसार उरुळी कांचन येथील अलंकार मंगल कार्यालयात झाला. लग्नावेळी माहेरच्या मंडळींनी सोन्याचे दागिने, संसारोपयोगी साहित्य तसेच लग्नाचा संपूर्ण खर्च केला होता. लग्नानंतर सुरुवातीचे पाच-सहा महिने संसार सुरळीत होता. मात्र, त्यानंतर सासू निर्मला वारे या पाहुण्यांसमोर अपमानास्पद बोलून मानसिक त्रास देऊ लागल्या. तसेच, माहेरच्यांनी लग्नात अपेक्षेप्रमाणे मानपान केला नाही, अशी कारणे सांगून वडिलांना शिवीगाळ केली जात असल्याचेही तक्रारदार महिलेने नमूद केले आहे.
गर्भवती असतानाही जड कामे करण्यास लावली.
डिसेंबर 2025 मध्ये आपण गर्भवती असल्याचे डॉक्टरांनी सांगितले होते. जड काम करू नये, असा सल्लाही डॉक्टरांनी दिला होता. ही माहिती पतीने सासूला दिल्यानंतरही सासूने ड्रममध्ये पाणी भरण्यासह जड कामे करण्यास सांगितल्याचा आरोप पीडिता यांनी केला आहे. ड्रममध्ये पाणी भरत असताना अचानक त्रास होऊन रक्तस्राव सुरू झाला. मात्र, त्यानंतरही उपचारासाठी रुग्णालयात नेण्यात आले नसल्याचा गंभीर आरोप त्यांनी केला आहे.
‘10लाख रुपये घेऊन ये’ असा तगादा
यानंतर पती व सासूने ‘तुझ्या आई-वडिलांनी आमच्या मनासारखे काही दिले नाही’, असे म्हणत नवीन फ्लॅट घेण्यासाठी माहेरून 10 लाख रुपये घेऊन ये, अशी मागणी केल्याचे तक्रारीत म्हटले आहे. पैसे आणण्यास असमर्थता व्यक्त केल्यावर पतीने शिवीगाळ व मारहाण केल्याचा आरोप आहे. तसेच दीरानेही मारण्यासाठी अंगावर धावून येत पैशांची मागणी केल्याचे महिलेने पोलिसांना सांगितले.
माहेरच्यांसमोर घराबाहेर काढले
22 जुलै 2026 रोजी पती संदेश वारे यांनी तक्रारदार महिलेच्या वडिलांना फोन करून घरी बोलावले. त्यानंतर तिचे वडील, आई, आत्या आणि मामा घरी गेले असता सासूने त्यांच्याकडे पुन्हा 10 लाख रुपयांची मागणी केली. पैसे देणार नसाल तर मुलीला कायमची माहेरी घेऊन जा, असे सांगून तिला घराबाहेर काढल्याचा आरोप आहे. तसेच, तिचे सोन्याचे दागिने, साड्या व इतर संसारोपयोगी साहित्य सासरच्यांनी ताब्यात ठेवले असून, ‘माहेरून 10 लाख रुपये घेऊन ये, त्यानंतरच सासरी नांदायला ये’, असे सांगून माहेरी पाठविल्याचे तक्रारीत नमूद आहे.
दरम्यान, या सर्व प्रकारामुळे 2 मे 2024 पासून 22 जुलै 2026 पर्यंत पती, सासू-सासरे आणि दीर यांनी शारीरिक व मानसिक छळ करून पैशांची मागणी केल्याचा आरोप विवाहितेने केला आहे. याप्रकरणी संबंधितांविरुद्ध लोणी काळभोर पोलीस ठाण्यात गुन्हा दाखल करण्यात आला असून, लोणी काळभोर पोलिसांकडून पुढील कायदेशीर कार्यवाही सुरू आहे.
