पुणे : ‘स्वच्छ भोर, सुंदर भोर’ या मोहिमेला गती देण्यासाठी आणि शहरात स्वच्छता राखण्यासाठी भोर नगरपरिषदेने प्लास्टिकविरोधात कठोर पावले उचलली आहेत. मंगळवारी (दि. 8) भोर येथील आठवडे बाजारात नगरपालिकेच्या आरोग्य विभागाने अचानक छापा टाकून बंदी असलेल्या प्लास्टिक पिशव्यांचा वापर करणाऱ्या विक्रेत्यांवर धडक कारवाई केली.
या मोहिमेदरम्यान नियम बाह्य प्लास्टिकचा वापर करणाऱ्या अनेक व्यापारी, व्यावसायिक आणि फेरीवाल्यांवर थेट कारवाई करण्यात आली. अधिकाऱ्यांनी दुकानांची पाहणी करून सुमारे 18 ते 20 किलो वजनाचा बंदी असलेला प्लास्टिक साठा हस्तगत केला व त्याची योग्य विल्हेवाट लावली. यासोबतच, नियमांचा भंग करणाऱ्या काही विक्रेत्यांना प्रथम इशारा देऊन त्यांच्याकडून दंडात्मक रक्कम वसूल करण्यात आली.
पर्यावरण संरक्षण कायदा 1986, घनकचरा व्यवस्थापन नियम 2026, तसेच महाराष्ट्र नगरपरिषद प्रशासन संचालनालयाच्या स्वच्छता व आरोग्य उपविधी 2019 आणि महाराष्ट्र नगरपरिषद नियम 1965 मधील तरतुदींनुसार ही कारवाई करण्यात आली आहे.
नगरपालिकेचे आरोग्य प्रमुख महेंद्र बांदल यांच्या नेतृत्वाखाली ही मोहीम राबवण्यात आली. या वेळी अमीर आतार, आकाश सागळे, शुभम मोहिते, दत्तात्रय जगताप, दत्ता पवार आणि शुभम यादव या पथकातील कर्मचाऱ्यांनी सक्रिय सहभाग घेतला.
नागरिकांना व व्यापाऱ्यांना आवाहन
शासनाने प्रतिबंधित केलेल्या प्लास्टिक साहित्याची विक्री, वाहतूक, साठवणूक अथवा वापर पूर्णपणे बंद करावा, असे आवाहन आरोग्य विभाग प्रमुख महेंद्र बांदल यांनी केले आहे. महाराष्ट्र अविघटनशील कचरा नियंत्रण नियम 2006 व महाराष्ट्र प्लास्टिक अधिसूचना 2018 चे उल्लंघन करणाऱ्यांवर यापुढे अधिक कडक आणि कायदेशीर कारवाई केली जाईल, असा इशाराही त्यांनी दिला. शहर स्वच्छ ठेवण्यासाठी सर्व नागरिक व व्यापाऱ्यांनी सहकार्य करावे, अशी अपेक्षा प्रशासनाने व्यक्त केली आहे.
