पुणे : लोहगड किल्ल्यावर दरीत पडून मृत्युमुखी पडलेल्या केतन अग्रवालचे प्रकरण आता अपघाती नसून एक पूर्वनियोजित कट असल्याचे समोर आले आहे. या प्रकरणात आता महत्वाची माहिती समोर आली आहे.सियाने केतनला कड्यावर उभे करून, धरणाचे पाणी आणि निसर्गसौंदर्य पाहत असताना वेगवेगळ्या अँगलने छायाचित्रे घेतली आहेत . ही सर्व छायाचित्रे पुढील कटाच्या नियोजनासाठी काढल्याचे तपासात निष्पन्न झाले आहे.
पोलिसांनी या प्रकरणात 5053 पानांचे सर्वसमावेशक आरोपपत्र न्यायालयात सादर केले आहे. यात आरोपी सिया गोयल, चेतन चौधरी आणि रितेश हांगे यांच्याविरोधात ठोस तांत्रिक पुरावे एकत्र करण्यात आले आहेत. तपास अहवालानुसार, केतनला दरीत ढकलण्यासाठी लोहगडावर सिया गोयलने 31 मे 2026 रोजीच पूर्वपाहणी केली होती एवढेच नव्हे, तर 14 जून रोजीही सियाने त्याला लोहगडावर नेऊन ढकलण्याचा प्रयत्न केला होता; मात्र तो बेत फसला. या गुन्ह्यात डिजिटल पुरावे अत्यंत महत्त्वाचे ठरले आहेत.
दरम्यान फॉरेन्सिक टीमने तपास करून आरोपींचे तब्बल 1801 चॅट्स रिकव्हर केले असून, त्यातील डिलीट केलेले 11 व्हॉट्सॲप चॅट्स पुन्हा मिळवण्यात यश आले आहे.पोलिसांनी संशयितांच्या मोबाईल डेटाचे सखोल विश्लेषण केले आहे. त्यामध्ये चॅटजीपीटीवरील 81 सर्च, बायोमी ॲपचे 135 चॅट्स, व्हॉट्सॲपचे 367, फेसबुकचे 19, इन्स्टाग्रामचे 248,स्नॅपचॅटचे 128, रिसेंडचे 410, नॉलेजसीवरील 151 आणि 262 नेटिव्ह मेसेजचा समावेश आहे.
आता हें सर्व मोबाईल पुरावे, सीडीआर, छायाचित्रे आणि तांत्रिक अहवाल आरोपपत्रात जोडल्याने आरोपींच्या अडचणीत वाढ झाली आहे.
