दिनेश सोनवणे
दौंड : पाटस (ता. दौंड) येथील भिमा साखर कारखाना कर्नाटक येथील साई प्रिया शुगर (निराणी शुगर्स) या कंपनीला भाडेतत्वावर चालवायला दिला आहे. आणि हा कारखाना या हंगामात सुरू होणार आहे. यामुळे शेतकरी व कामगारांमध्ये आनंदाचे वातावरण तयार झाले आहे.
पाटस येथील भिमा पाटस कारखाना चालविण्यासाठी देण्याचा करार राज्य सहकारी बँकेने नुकताच केला आहे. त्या करारानुसार आज सकाळीच साई प्रिया शुगर(निराणी शुगर) चे संचालक संगमेश निराणी यांनी कारखान्यास भेट देवुन संपुर्ण माहिती घेतली. यावेळी कारखान्याचे अध्यक्ष आमदार राहुल कुल, भिमा पाटसचे माजी उपाअध्यक्ष सत्वशिल शितोळे यांच्यासह कारखान्याचे संचालक मंडळ आदी मान्यवर उपस्थित होते.
यावेळी भिमा पाटसचे अध्यक्ष आमदार राहुल कुल म्हणाले की, राज्य सहकारी बँकेने कारखाना भाडेतत्त्वावर देण्यासाठी निविदा प्रसिध्द केली होती. त्यानुसार साई प्रिया शुगर (निराणी शुगर) ला निविदा मिळाली होती. कारखाना हा सहकारी तत्वावरच सुरू राहणार आहे. साई प्रिया शुगर (निराणी शुगर) यांना कारखान्यासाठी पुर्ण सहकार्य करणार आहे.
दरम्यान, यावेळी कारखान्याचे माजी उपाअध्यक्ष सत्वशील शितोळे यांनीही कारखाना लवकर सुरू करा व त्यासाठी आमच्याकडून जे सहकार्य हवे असल्यास ते आम्ही करु असे. आश्वासन त्यांनी दिले.
कर्नाटक येथील साई प्रिया शुगर(निराणी शुगर) चे संचालक संगमेश निराणी यांनी पाहणी करताना, कारखान्याचे कामकाज तात्काळ सुरू करण्याच्या सूचना दिल्या आहेत. तसेच कामगारांना उद्याच कामावर येण्याच्या सूचना देखिल केल्या आहेत. कारखाना सुरु होणार असल्याने शेतकरी व कामगारांमध्ये आनंदाचे वातावरण तयार झाले आहे.
