Bhigvan News : भिगवण, (पुणे) : इंदापूर कृषी उत्पन्न बाजार समिती अंतर्गत येत असलेल्या भिगवण उपबाजार परिसरात सध्या प्रतिबंधित असलेल्या ‘भुगा माशांची’ बेकायदेशीर विक्री मोठ्या प्रमाणावर सुरू आहे. या बेकायदेशीर व्यवसायामुळे संपूर्ण परिसरात कमालीची अस्वच्छता आणि असह्य दुर्गंधी पसरली असून, स्थानिक नागरिकांच्या आरोग्याचा प्रश्न गंभीर बनला आहे. काही ठराविक व्यापाऱ्यांच्या आर्थिक फायद्यासाठी प्रशासनाने लाखो नागरिकांचे आरोग्य पणाला लावल्याचा घणाघाती आरोप आता ग्रामस्थांमधून होत आहे. Bhigvan News :
ग्रामस्थांनी दिलेल्या निवेदनानुसार, मत्स्यसंपत्तीच्या संवर्धनासाठी आणि जलचरांच्या संरक्षणासाठी शासनाने लहान आकाराच्या माशांची (भुगा मासे) मासेमारी करणे, त्यांची पकड करणे आणि विक्री करणे यावर कायदेशीर निर्बंध घातले आहेत. असे असतानाही, भिगवण उपबाजारात या नियमांची सर्रास अंमलबजावणी न करता दररोज रात्री आणि पहाटे मोठमोठ्या कंटेनरमधून खराब व दुर्गंधीयुक्त भुगा मासे आणले जात आहेत. या अवैध व्यापारात दरमहा लाखो रुपयांची काळी उलाढाल होत असल्याची चर्चा परिसरात रंगली आहे. Bhigvan News :
मार्केट परिसरात कचऱ्याची आणि टाकाऊ अवशेषांची कोणतीही विल्हेवाट लावली जात नाही. मासळीचे सडलेले अवशेष आणि साचलेल्या घाण पाण्यामुळे तब्बल एक किलोमीटर परिसराचा श्वास कोंडला आहे. याचा सर्वाधिक फटका लहान मुले, वृद्ध आणि स्थानिक व्यापाऱ्यांना बसत आहे. धक्कादायक बाब म्हणजे, हे मासे वाहून आणणारे कंटेनर चालक कंटेनरमधील रक्तमिश्रित घाण पाणी जाणीवपूर्वक भिगवण-राशीन महामार्गावर सोडून देतात, ज्यामुळे रस्त्यावरील पादचाऱ्यांना आणि इतर वाहनधारकांना उलट्यांचा त्रास सहन करावा लागत आहे. Bhigvan News :
स्थानिक नागरिकांच्या म्हणण्यानुसार, या समस्येबाबत दरवर्षी कृषी उत्पन्न बाजार समिती इंदापूर प्रशासनाला निवेदने दिली जातात. मात्र, दरवेळी केवळ तात्पुरती मलमपट्टी करून नागरिकांची बोळवण केली जाते. उपबाजारातील संबंधित कर्मचारी आणि अधिकारी या गंभीर प्रकाराकडे जाणीवपूर्वक डोळेझाक करत असून, भ्रष्ट व्यापाऱ्यांना पाठीशी घालत असल्याचा संताप व्यक्त होत आहे. Bhigvan News :
दरम्यान, या समस्येची गंभीर दखल घेत ग्रामस्थांनी कृषी उत्पन्न बाजार समिती इंदापूर, तहसीलदार कार्यालय, तालुका वैद्यकीय अधिकारी (पंचायत समिती इंदापूर) आणि भिगवण ग्रामपंचायत यांना लेखी निवेदने दिली आहेत. Bhigvan News :
प्रेम जगताप, सागर देहाडे, रोहन देहाडे व विशाल कांबळे यांनी कृषी उत्पन्न बाजार समिती इंदापूर उपबाजार भिगवण प्रशासनाने या दुर्गंधीयुक्त समस्येवर लवकरात लवकर कायमस्वरूपी उपाययोजना न केल्यास तीव्र आंदोलन छेडण्यात येईल, असा इशारा दिला आहे. आता या आरोग्यास घातक ठरणाऱ्या अवैध व्यवसायावर इंदापूरचे तहसीलदार आणि बाजार समिती प्रशासन काय दणका देणार, याकडे संपूर्ण भिगवण परिसराचे लक्ष लागले आहे. Bhigvan News :
