Loni Kalbhor News लोणी काळभोर, ता. 18 : “तू आमच्याकडे का पाहतो? आम्ही येथील भाई आहोत… तुझा मर्डर करून टाकतो,” अशी धमकी देत चौघांनी एका तरुणाला लाथाबुक्क्यांनी बेदम मारहाण करून त्याच्या डोक्यात बिअरच्या बाटल्या फोडल्याची धक्कादायक घटना घडली आहे. ही घटना कदमवाकवस्ती (ता. हवेली) येथील सागर रेस्टॉरंट अँड बारमध्ये शनिवारी (ता. 16) रात्री साडेदहाच्या सुमारास घडली. या हल्ल्यात तरुण गंभीर जखमी झाला असून, लोणी काळभोर पोलिसांनी चौघांविरोधात गुन्हा दाखल केला आहे. घटनेमुळे परिसरात भीतीचे वातावरण निर्माण झाले आहे. Loni Kalbhor News
राज राजेंद्र पवार, सौरभ सुनील गायकवाड, राहुल संतोष गाडगे आणि 17 वर्षीय विधीसंघर्ष बालक (सर्व रा. कवडीपाट टोलनाका, कदमवाकवस्ती, ता. हवेली, जि. पुणे) अशी गुन्हा दाखल झालेल्या आरोपींची नावे आहेत. याप्रकरणी प्रसाद दिलीप शेंडगे (वय 30, रा. कवडीपाट टोलनाका, कदमवाकवस्ती, ता. हवेली, जि. पुणे) यांनी लोणी काळभोर पोलीस ठाण्यात फिर्याद दिली आहे. Loni Kalbhor News
पोलिसांनी दिलेल्या माहितीनुसार, प्रसाद शेंडगे हे कवडीपाट परिसरातील सागर बार अँड रेस्टॉरंटमध्ये जेवण करत होते. त्यावेळी त्यांच्या मागील टेबलावर आरोपी बसले होते. अचानक आरोपींनी “आमच्याकडे का पाहतो? आम्ही येथील भाई आहोत,” असे म्हणत शेंडगे यांना शिवीगाळ करण्यास सुरुवात केली. त्यानंतर चौघांनी मिळून त्यांना लाथाबुक्क्यांनी मारहाण केली. Loni Kalbhor News
यानंतर आरोपींनी शेजारील टेबलवरील बिअरच्या बाटल्या उचलून शेंडगे यांच्या डोक्यावर, छातीवर, नाकावर, कानावर आणि गळ्यावर वार करत त्यांना गंभीर जखमी केले. एवढ्यावरच न थांबता आरोपींनी दगड फेकून मारत “तुझा मर्डर करून टाकतो,” अशी धमकीही दिली. तसेच बाहेर उभ्या असलेल्या तुकाराम राजेंद्र कांबळे (रा. लडकत रोड, शिवनगर, मुंढवा, पुणे) यांनाही मारहाण करण्यात आल्याचे फिर्यादीत नमूद आहे.
जखमी प्रसाद शेंडगे यांच्यावर लोणी काळभोर येथील विश्वराज हॉस्पिटलमध्ये अतिदक्षता विभागात उपचार सुरू आहेत. त्यांच्या फिर्यादीवरून लोणी काळभोर पोलिसांनी भारतीय न्याय संहिता 2023 अंतर्गत कलम 109, 118(1), 115(2), 125, 352, 351(2)(3), 3(5) तसेच क्रिमिनल लॉ अमेंडमेंट कलम 7 अन्वये गुन्हा दाखल केला आहे. Loni Kalbhor News
दरम्यान, गुन्हा दाखल झाल्यानंतर आरोपी फरार झाले असून, त्यांचा शोध घेण्यासाठी पोलिसांची विशेष पथके रवाना करण्यात आली आहेत. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक रुपाली जाधव करत आहेत. Loni Kalbhor News
