मुंबई : राज्यातील दुकानांच्या आणि आस्थापनांच्या पाट्या मराठीत असाव्यात, या मुद्द्यावर मनसेने सतत आंदोलनाचा पवित्रा घेतला आहे. यापूर्वीही मनसेने मराठी पाट्यांचा आग्रह धरत आंदोलन केले आहे. मराठी भाषेत फलक असावेत असा नियम असतानाही या नियमाला हरताळ फासला जात असल्यामुळे मनसे आक्रमक झाली आहे. या प्रकरणात मनसेने आंदोलनाचा इशारा देत दिलेली डेडलाईन उद्या (ता. २५) संपत आहे. याप्रकरणी खळ्ळखट्याक आंदोलन करण्याचा इशारा मनसेने दिला आहे.
महाराष्ट्रातील दुकाने आणि आस्थापनांवरील नामफलक हे मराठीत लावण्याचे आदेश सर्वोच्च न्यायालयातील न्यायमूर्ती बी. व्ही. नागरत्ना आणि न्यायमूर्ती उज्वल भुयान यांच्या खंडपीठाने पारित केले आहेत. तसेच २ महिन्यांच्या आत अर्थात २५ नोव्हेंबरपूर्वी या आदेशाची अंमलबजावणी करावी असे म्हटल्याचे बॅनर मनसेने मुंबईत लावले आहेत. मात्र, अजूनही महाराष्ट्रात काही ठिकाणी दुकानांच्या पाट्या मराठी नसल्याचे मनसेने निदर्शनास दिले असून, खळ्ळखट्याक आंदोलन करण्याचा इशाराही दिला आहे.
मुंबई महानगर पालिकेच्या सहायक आयुक्त देवणार गोंवडी यांना मनसेने पत्र लिहून दुकान आणि आस्थापनांच्या पाट्या मराठी करण्यासंदर्भात सुचविले आहे. सर्वोच्च न्यायालयाच्या आदेशाचाही त्यात उल्लेख केला आहे. सध्या अनेक दुकाने आणि आस्थापनांवर मराठी पाट्या वा नामफलक नसल्याचेही पत्रात म्हटले आहे.
न्यायालयीन आदेश पायदळी तुडविणाऱ्या दुकाने आणि आस्थापना तसेच न्यायालयीन आदेश न पाळणाऱ्या जबाबदार विभागीय अधिकाऱ्यांविरोधात महाराष्ट्र नवनिर्माण सेना रस्त्यावर उतरणार आहे. याच्या पुढील परिणामांना सर्वस्वी पालिका प्रशासन जबाबदार असेल, असा इशाराही मनसेने दिला आहे. लोकसभा निवडणुकांच्या तोंडावर मनसेने मराठी मुद्दा हाती घेतल्यामुळे राजकीय वर्तुळात चर्चा रंगली आहे.
