मुंबई : गेल्या काही दशकांपासून देशात आणि जगात फ्रोजन ब्रेस्ट मिल्कची मागणी वाढत असल्याचे दिसून येत आहे. अशात मोदी सरकारने एक मोठा निर्णय घेतला आहे. ‘आईचे दूध’ विकणाऱ्यांविरोधात कडक भूमिका घेत, मोदी सरकारने देशात आईचे दुध विकण्यावर बंदी घातली आहे.
जर कोणी नियमांचे उल्लंघन केले तर त्याच्यावर कारवाई केली जाईल, त्याचप्रमाणे त्याचा परवाना रद्द केला जाऊ शकतो. अवैध प्रकारे व्यवसाय करणाऱ्यांवर भारत सरकार सातत्याने कठोर कारवाई करत आहे. आता दिवाळीपूर्वी अवैध व्यापाऱ्यांवर सरकारची मोठ्या प्रमाणावर कारवाई सुरू आहे. मिळालेल्या माहितीनुसार, भारत सरकारने स्पष्टपणे सांगितले आहे की, ‘मातेचे दूध’ भारतात विक्रीस परवानगी दिली जाणार नाही.
आईचे दूध (Mother’s Milk) प्रत्येक मुलासाठी अत्यंत पौष्टिक मानले जाते. नवजात आणि लहान मुलांनी आईचे दूध प्यायल्यास त्यांची प्रतिकारशक्ती मजबूत होते, पचनक्रिया व्यवस्थित राहते, संसर्गाचा धोका कमी असतो आणि मुलांची वाढही चांगली होते.
भारतीय अन्न सुरक्षा आणि मानक प्राधिकरण (FSSAI) परवान्याखाली दूध किंवा दुग्धजन्य पदार्थांच्या नावावर आईच्या दुधाच्या विक्रीशी संबंधित कोणताही अहवाल समोर आल्यास, अशा दुधाचा साठा जप्त करून परवाना रद्द केला जाईल. अशा फूड बिझनेस ऑपरेटर (FBOs) विरुद्ध FSS कायदा 2006 च्या तरतुदींनुसार आणि त्याखाली बनवलेल्या नियम/नियमांनुसार योग्य कायदेशीर कारवाई केली जाईल.भारतात काही कंपन्या 300 मिली फ्रोझन दूध 4500 रुपयांना विकत होत्या.
गेल्या महिन्यात जुलैमध्ये, भारतीय अन्न सुरक्षा आणि मानक प्राधिकरणाने अशाच एका कंपनीवर कारवाई केली आणि तिचा परवाना रद्द केला. Neolacta Lifesciences Private Limited (NLPL) नावाची कंपनी भारतात आईचे दूध विकण्याचे काम करत होती. या बेंगळुरूस्थित कंपनीवर काही कार्यकर्त्यांनी आक्षेप घेतला होता, त्यानंतर FSSAI ने कारवाई करत तिचा परवाना रद्द केला.
