नवी दिल्ली: पुण्याच्या माजी पोलीस आयुक्त मीरा बोरवणकर यांच्या ‘मॅडम कमिश्नर’ या पुस्तकातील एका प्रकरणात उपमुख्यमंत्री अजित पवार यांच्यावर करण्यात आलेल्या आरोपाने राज्यातील राजकारण चांगलेच तापले आहे. अशातच माजी आयपीएस अधिकारी मीरा बोरवणकर यांनी दिल्लीत पत्रकार परिषद घेत आपली भूमिका स्पष्ट केली आहे. ‘मॅडम कमिश्नर’ या पुस्तकात एकूण 38 प्रकरणे आहेत. येरवड्यातील जमिनीबाबत पुस्तकात फक्त एकच प्रकरण आहे. त्यामुळे एकाच प्रकरणापुरते या पुस्तकाला संकुचित करू नका, असे आवाहन यावेळी त्यांनी केले.
मीरा बोरवणकर यांनी सोमवारी सायंकाळी दिल्लीत पत्रकार परिषद घेत उपमुख्यमंत्री अजित पवार यांच्यावर सुरू असलेल्या आरोपांबाबत त्यांनी भाष्य केले. बोरवणकर यांनी म्हटले की, पुस्तकात 38 प्रकरणे आहेत. पुस्तकात एकतर्फी प्रेमात तरुणीची झालेली हत्या, मानवी तस्करी, जळगाव सेक्स स्कँडल अशी अनेक प्रकरणे आहेत. एकाच प्रकरणाबद्दल मला सारखी विचारणा करू नका. हे पुस्तक मुली-महिलांचे शोषण, प्रशासन, उत्कृष्ट तपास अशा विविध मुद्यांवर आहे.
उपमुख्यमंत्री अजित पवारांच्या आरोपांबाबत काय म्हणाल्या?
माजी आयपीएस अधिकारी मीरा बोरवणकर यांनी अजित पवार यांच्या प्रकरणाबाबत म्हटले की, पुणे पोलिसांच्या अखत्यारीत असलेल्या जमिनीच्या लिलावासाठी राज्य सरकारने एक समिती नेमली होती. त्या समितीने आपली प्रक्रिया पूर्ण केली. पुणे पोलिसांचा कार्यभार माझ्याकडे असल्याने जमिनीवरील ताबा सोडण्याची प्रक्रिया पूर्ण करण्याची सूचना करण्यात आली होती. अजित पवार यांनीदेखील हाच आग्रह धरला होता. लिलाव झाल्याने आता हस्तांतरण प्रक्रिया सुरू करा असे पवार म्हटले. मात्र, माझ्या दृष्टीने ती जागा खूप महत्त्वाची होती. पुढे जाऊन पुणे पोलीस आयुक्तालय, पोलिसांच्या गृहनिर्माणासाठी ही जागा वापरता आली असती. त्यामुळेच मी त्या तीन एकर जमिनीच्या लिलावाला आक्षेप घेत हस्तांतरणाला विरोध केला असल्याचे मीरा बोरवणकर यांनी सांगितले.
पुढे बोलताना मीरा बोरवणकर यांनी म्हटले की, येरवड्याची जागा ही शाहीद बलवा या बिल्डरला देण्यात येणार होती. या लिलावात त्यांनी बाजी मारली. मात्र, टूजी घोटाळ्यात पुढे सीबीआयने त्यांना अटक केल्याने सरकारची संभाव्य होणारी अवहेलना टळली.
