पुणे : पुण्यातील भाजप आमदार भीमराव तापकीर यांच्या घरात घुसण्याचा प्रयत्न एका व्यक्तीकडून करण्यात आल्याचा धक्कादायक प्रकार समोर आला आहे. याप्रकरणी आता शंकर सर्जेराव धुमाळ (वय 47 वर्षे) या व्यक्तीला अटक करण्यात आली आहे.
याबाबत मिळालेल्या माहितीनुसार, आमदार भीमराव तापकीर यांच्या धनकवडी परिसरातील घरात घुसण्याचा प्रयत्न शंकर धुमाळ या व्यक्तीने केला होता. धुमाळ हा वारंवार आमदार यांच्या घराजवळ जाऊन गोंधळ घालत होता.त्याने तीन वेळा आमदारांच्या घरात घुसण्याचा प्रयत्न केला असता आमदारांच्या सुरक्षेसाठी तैनात असणाऱ्या पोलीस कर्मचाऱ्याने त्याला रोखण्याचा प्रयत्न केला. मात्र
त्यांनाही आरोपीने शिवीगाळ करत मारहाण करण्याची धमकी दिली होती.या प्रकरणी सहकारनगर पोलिस ठाण्यात तक्रार देण्यात आली होती.
दरम्यान सुरुवातीला आरोपीवर किरकोळ स्वरूपाची कारवाई करण्यात आली. मात्र त्यानंतरही तो पुन्हा पुन्हा येत राहिला आणि शिवीगाळ करत धमक्या देत राहिला. या प्रकरणात कारवाई न झाल्यामुळे आमदारांनी थेट पुणे पोलिस आयुक्त अमितेश कुमार यांना पत्र पाठवून लक्ष घालण्याची मागणी केली होती. त्यानुसार त्याला अटक करण्यात आली आहे.याप्रकरणी पुण्यातील सहकार नगर पोलीस ठाण्यात त्याच्या विरोधात गुन्हा दाखल करण्यात आला आहे.
कोण आहेत भीमराव तापकीर?
भीमराव तापकीर हे भारतीय जनता पक्षाचे सदस्य आहेत. तापकीर हे 2011 (पोटनिवडणूक), 2014, 2019 आणि 2024 मध्ये पुण्यातील खडकवासला विधानसभा मतदारसंघातून सलग चार वेळा महाराष्ट्र विधानसभेवर आमदार म्हणून निवडून आले आहेत. 2001 मध्ये त्यांनी पुणे महानगरपालिकेच्या स्थानिक स्वराज्य संस्थेच्या निवडणुकीतून आपल्या कारकिर्दीला सुरुवात केली होती. सलग दोन वेळा ते नगरसेवक म्हणून निवडून आले आहेत.
