आदित्य बोराटे
इंदापूर : व्याहाळी (ता. इंदापूर) येथील नवीन बांधकाम सुरू असलेल्या, दरवाजा व खिडक्या नसलेल्या घरातील डब्यात ठेवलेले तीन तोळ्यांचे मनी मंगळसूत्र तिघांनी चोरून नेल्याची फिर्याद सिद्धनाथ अंकुश माने (वय 31, रा. व्याहाळी, ता. इंदापूर) यांनी इंदापूर पोलिस ठाण्यात दिली आहे. मंगळसूत्राची किंमत 2 लाख 10 हजार रुपये असल्याचे फिर्यादीत नमूद आहे.
पोलिसांनी दिलेल्या माहितीनुसार, तीन ऑक्टोबर रोजी रात्री दोनच्या सुमारास व्याहाळी गावच्या हद्दीत हा प्रकार घडला. सिद्धनाथ माने यांच्या आजी केशर सुखदेव माने (वय 75) यांचे तीन तोळ्यांचे मनी मंगळसूत्र घरातील डब्यात ठेवले होते. अशोक उर्फ लिंग्या नामदेव शिंदे, तुषार नानासाहेब सोलनकर आणि जिंदाल काळे (पूर्ण नाव माहीत नाही), तिघेही रा. व्याहाळी, ता. इंदापूर, यांनी आजीच्या संमतीशिवाय लबाडीच्या इराद्याने मंगळसूत्र चोरी करून नेत असताना त्यांना पाहिल्याचे फिर्यादीत नमूद आहे.
या प्रकरणी इंदापूर पोलिस ठाण्यात गु.र.नं. 625/2026, भारतीय न्याय संहिता 2023 चे कलम 303(2), 3(5) अन्वये 6 ऑक्टोबर रोजी रात्री 12.55 वाजता गुन्हा दाखल करण्यात आला आहे. दाखल अंमलदार म्हणून पोलीस हवालदार भोईटे (ब.नं. 702), तर तपासी अंमलदार म्हणून पोलीस हवालदार चंदनशिवे (ब.नं. 2608) काम पाहत आहेत.
