मुंबई : मुंबईतील प्रसिद्ध छत्रपती शिवाजी पार्क मैदानावर विनापरवानगी आंदोलन केल्यामुळे कॉक्रोच जनता पक्षाचे प्रमुख अभिजीत दिपके यांच्यासह त्यांच्या कार्यकर्त्यांवर पोलिसांनी गुन्हा नोंदवला आहे. नियमांचे उल्लंघन करून हा कार्यक्रम आयोजित केल्याने दिपके यांच्या अडचणीत मोठी वाढ झाली आहे.
कॉक्रोच जनता पक्षाच्या या आंदोलनाला मुंबई पोलिसांची कोणतीही अधिकृत मंजुरी मिळाली नव्हती. तसेच तेथील स्थानिक रहिवाशांनीदेखील या सभेला तीव्र विरोध दर्शवला होता. मात्र, सर्व विरोधांना बाजूला सारत कॉक्रोच जनता पक्षाचे कार्यकर्ते आपल्या भूमिकेवर ठाम राहिले. स्थानिकांच्या विरोधामागे भाजपच्या पदाधिकाऱ्यांचा हात असल्याचा आरोप अभिजीत दिपके यांनी यावेळी केला. या आंदोलनासाठी देशाच्या विविध भागांतून तरुण आणि काही प्रसिद्ध सेलिब्रिटी शिवाजी पार्कात एकत्र आले होते. कार्यक्रमादरम्यान झालेल्या मोठ्या सभेत दिपके यांनी पंतप्रधान नरेंद्र मोदी, मुख्यमंत्री देवेंद्र फडणवीस आणि निवडणूक आयुक्त ज्ञानेश कुमार यांच्यावर जोरदार शब्दांत टीका केली.
दुसरीकडे, ॲडव्होकेट सिद्धी देवळेकर यांनी या बेकायदेशीर आंदोलनाविरोधात पोलीस ठाण्यात तक्रार दाखल केली. या तक्रारीत त्यांनी नमूद केले की, परवानगी नसताना घेतलेल्या या कार्यक्रमामुळे परिसरातील शांततेला बाधा पोहोचली असून नागरिकांना नाहक त्रास सहन करावा लागला. वकिलांनी उच्च न्यायालयाच्या 2013 मधील एका महत्त्वाच्या निर्णयाचा हवाला दिला, ज्यानुसार शिवाजी पार्क परिसरात अशा प्रकारच्या आंदोलनांवर बंदी आहे.
आता मुंबई पोलिसांनी या तक्रारीची दखल घेत अभिजीत दिपके यांच्यासह त्यांच्या कार्यकर्त्यांवर गुन्हा दाखल केला असून पुढील कारवाई सुरू केली आहे.त्यामुळे त्यांच्या अडचणीत आणखीन वाढ झाली आहे.
