पुणे : मद्यप्रेमींसाठी महत्त्वाची माहिती समोर आली आहे. बाजारात मिळणाऱ्या काही नामांकित दारूच्या ब्रँड्समध्ये भेसळ होत असल्याचे उघडकीस आले असून, भारतीय अन्न सुरक्षा आणि मानके प्राधिकरणाने त्यांच्या विशिष्ट उत्पादनांवर बंदी घातली आहे.त्यामुळे,मद्यप्रेमींना मोठा धक्का बसला आहे.
दारू तयार करताना नैसर्गिक प्रक्रियेचा वापर न करता कृत्रिम फ्लेवर्सचा अतिवापर केला जात असल्याचे FSSAI च्या चाचण्यांमध्ये सिद्ध झाले आहे. मळी, माल्ट आणि नैसर्गिक किण्वन प्रक्रियेऐवजी चवहीन न्यूट्रल स्पिरिट वापरून त्यात कृत्रिम सुगंध व चव मिसळली जात होती. तसेच, ‘ओल्ड मंक XXX रम’ सारख्या लोकप्रिय ब्रँडवर असलेले ‘7 वर्षे जुने ब्लेंडेड’ हे लेबलही तपासात खोटे आढळले आहे.
आता या कारवाईनंतर ग्राहकांची दिशाभूल थांबवण्यासाठी FSSAI ने कडक नियम जारी केले आहेत. त्यानुसार व्हिस्की किंवा रम बनवताना जर कृत्रिम फ्लेवर वापरला असेल, तर त्याची स्पष्ट माहिती बाटलीच्या लेबलवर छापणे आता बंधनकारक असेल.
उत्पादक कंपन्यांनी नोंदवलेल्या आक्षेपानंतर, बाटलीवर वापरलेल्या सर्व घटकांचा स्पष्ट उल्लेख करण्याच्या अटीवर उपलब्ध साठा विकण्यास परवानगी देण्यात आली आहे.
प्राधिकरणाने हे स्पष्ट केले आहे की, ही कारवाई पूर्ण दारू उद्योगावर नसून फक्त नियमांचे उल्लंघन करणाऱ्या ठराविक उत्पादकांवरच करण्यात आली आहे. या निर्णयामुळे ग्राहकांना भेसळयुक्त उत्पादनांऐवजी अस्सल दर्जाची दारू ओळखणे अधिक सोपे होणार आहे.
