दौंड : दौंड तालुक्यातील दहिटणे या गावांमध्ये बापूजी बूवा वस्ती परिसरात एका मेंढपाळाचा दहा महिन्याचा मुलगा आण्विक भिसे (वय १० महिने ) याला अंथरुणातून सकाळी ९.३० वाजण्याच्या सुमारास बिबट्याने उचलून नेल असल्याची धक्कादायक घटना घडली आहे. धुळाजी भिसे असं वडिलांचे नाव आहे.गेल्या दोन दिवसापूर्वी हे मेंढपाळ कुटुंब या परिसरात आपल्या बकऱ्या घेऊन चारण्यासाठी आले होते.
याबाबत अधिक माहिती अशी की, मेंढपाळाच्या दहा महिन्याच्या मुलग्याला बिबट्याने उचलून नेल्यानंतर संबंधित बाळाच्या आईने जोर जोरात आरडाओरडा केला. मात्र तरीही मुलाला घेऊन बिबट्याने धूम ठोकली. ही धक्कादायक घटना परिसरात वाऱ्यासारखी पसरली व ग्रामस्थांनी याची माहिती वन विभागातील कर्मचाऱ्यांना कळवली व वनविभागाचे कर्मचारी व यवत पोलीस कर्मचारी हे संयुक्तपणे बिबट्याचा शोध घेत असून आत्तापर्यंत आलेल्या वृत्तप्रमाणे बिबट्याचा व बाळाचा शोध लागलेला नाही.
सकाळच्या दिनचर्याप्रमाणे हे मेंढपाळ बांधव आपली काम करत होते यावेळी ही लहान बाळ अंथरुणामध्ये झोपले होते,यावेळीच दबा धरून असलेल्या बिबट्याने डाव साधला.
ग्रामस्थांचा आक्रोश
दौंड तालुक्यातील अनेक भागांमध्ये बिबट्याचे सातत्याने दर्शन होत आहे.शेतकऱ्यांसह मजुरांना बिबट्या हा कायमच शेतामध्ये दिसत असून याची वनविभागाला पूर्व कल्पना देऊनही याकडे डोळेझाक केली जाते. यामुळेच हा धक्कादायक प्रकार घडल्याचे ग्रामस्थांनी सांगितले.
