उरुळी कांचन : बोरीऐंदी गावाजवळ बुलेट दुचाकी आणि भरधाव हायवा टिप्परची समोरासमोर जोरदार धडक होऊन दोन मित्र जखमी झाल्याची घटना शुक्रवारी (ता. 23) सकाळी साडेअकराच्या सुमारास घडली. अपघातानंतर टिप्परचालक घटनास्थळी न थांबता पसार झाल्याचे फिर्यादीत नमूद आहे. याप्रकरणी यवत पोलीस ठाण्यात अज्ञात टिप्परचालकाविरुद्ध गुन्हा दाखल करण्यात आला आहे.
सुरज राजेश प्रसाद वय 21 वर्षे व्यवसाय शिक्षण रा. उरुळीकांचन, मुखाकी दर्शन सोसायटी, डाळींब रोड उरुळी कांचन ता. हवेली) व शिरीष किशोर लोणारी असे अपघातात जखमी झालेल्या दोघांची नावे आहेत.
सुरज प्रसाद हा उरुळी कांचन येथील अस्मिता कॉलेजमध्ये शिक्षण घेत आहे. शुक्रवारी सकाळी तो मित्र किशोर लोणारी याच्यासोबत त्याच्या बुलेट दुचाकीवरून कामानिमित्त बोरीऐंदी येथे गेला होता. काम आटोपून दोघेही उरुळी कांचनकडे परतत असताना सुरज दुचाकी चालवत होता, तर शिरीष मागे बसला होता. बोरीऐंदी गावात दर्याजवळ आले असता, बोरीऐंदी फाट्याकडून ताम्हणवाडीच्या दिशेने भरधाव वेगाने येणाऱ्या हायवा टिप्परने त्यांच्या बुलेटला समोरून जोरदार धडक दिली. या धडकेत दोघेही रस्त्यावर पडले. सुरजला मुका मार लागला, तर शिरीषच्या उजव्या गुडघ्याला दुखापत झाली.
अपघातानंतर स्थानिक नागरिकांनी रुग्णवाहिका बोलावली. जखमी शिरीषला उपचारासाठी उरुळी कांचन येथील सिद्धिविनायक रुग्णालयात दाखल करण्यात आले असून, त्याच्यावर उपचार सुरू आहेत. अपघातास कारणीभूत ठरलेला हायवा टिप्पर क्रमांक MH 12 WJ 8554 वरील चालक घटनास्थळावरून निघून गेल्याचे तक्रारीत म्हटले आहे. याप्रकरणी यवत पोलीस ठाण्यात गुन्हा दाखल करण्यात आला असून पोलीस उपनिरीक्षक थिकोळे पुढील तपास करीत आहेत.
