पुणे : राज्य माध्यमिक आणि उच्च माध्यमिक मंडळातर्फे फेब्रुवारी आणि मार्च महिन्यात घेण्यात आलेल्या शालान्त प्रमाणपत्र परीक्षा अर्थात दहावीच्या परीक्षेचा निकाल आज जाहीर करण्यात आला. यावर्षी देखील कोकण विभागाने 98.82 टक्क्याने बाजी मारली आहे. महाराष्ट्राचा दहावीचा निकाल 94.10% लागला आहे तर यात पुणे विभागाचा निकाल 94.81% लागला आहे. यंदाही राज्यात मुलींनी बाजी मारली आहे.
महाराष्ट्र राज्य माध्यमिक आणि उच्च माध्यमिक शिक्षण मंडळाचे अध्यक्ष शरद गोसावी यांनी दिलेल्या माहितीनुसार, मंडळाच्या नऊ विभागांमधून 15 लाख 58 हजार 20 नियमित विद्यार्थ्यांनी नोंदणी केली होती. त्यापैकी 15 लाख 46 हजार 579 परीक्षेला बसले होते. त्यापैकी 14 लाख 55 हजार 433 विद्यार्थी परीक्षेत उत्तीर्ण झाले. त्याची टक्केवारी 94.10 टक्के इतकी आहे. सर्व विभागीय मंडळातून कोकण विभागाचा निकाल सर्वाधिक म्हणजे 98.82 टक्के इतका लागला. तर सर्वात कमी निकाल नागपूरचा म्हणजे 90.78 टक्के इतका लागला. दहावीच्या परीक्षेत एकूण 62 विषयांची परीक्षा घेण्यात आली होती. त्यापैकी 24 विषयांचा निकाल 100 टक्के लागला आहे.
कोणत्या विभागाचा निकाल किती टक्के?
पुणे -९४.८१ टक्के
नागपूर- ९०.७८ टक्के
संभाजीनगर- ९२.८२ टक्के
मुंबई-९५.८४ टक्के
कोल्हापूर- ९६.७८ टक्के
अमरावती-९२.९५ टक्के
नाशिक- ९३.०४
लातूर-९२.७७
कोकण- ९९.८२
कुठे पाहता येईल निकाल?
https://results.digilocker.gov.in
https://sscresult.mahahsscboard.in
https://results.targetpublications.org
विद्यार्थ्यांना या संकेतस्थळांवर विषयनिहाय गुण उपलब्ध होतील व सदर माहितीची प्रतही घेता येईल. शाळांना https://mahahsscboard.in (in school login) या संकेतस्थळावर एकत्रित निकाल उपलब्ध होईल.
