पुणे : रिझर्व्ह बँक ऑफ इंडियानं (RBI Recruitment 2025) ग्रेड बी ऑफिसर (Grade B Officer) पदाच्या 120 जागांसाठी अर्ज मागवले आहेत. या भरतीसाठी अर्ज प्रक्रिया आजपासून सुरू झाली असून उमेदवारांना 30 सप्टेंबरपर्यंत अर्ज करण्याची संधी मिळणार आहे. या पदांसाठीची परीक्षा येत्या 18 आणि 19 ऑक्टोबर रोजी घेण्यात येणार आहे.
पदांची विभागणी
या भरतीमध्ये ग्रेड बी ऑफिसर जनरल कॅटेगरी अंतर्गत 83 जागा, ग्रेड बी डीईपीआर अंतर्गत 17 जागा आणि ग्रेड बी डीएसआयएम अंतर्गत 20 जागा अशा एकूण 120 पदांचा समावेश आहे.
शैक्षणिक पात्रता
-ऑफिसर ग्रेड बी जनरल पदासाठी उमेदवार कोणत्याही विषयात पदवीधर असावा आणि किमान 60 टक्के गुणांसह उत्तीर्ण असणे आवश्यक आहे. एससी, एसटी आणि दिव्यांग उमेदवारांसाठी ही किमान अट 55 टक्के आहे.
-ऑफिसर ग्रेड बी डीईपीआरसाठी अर्थशास्त्र किंवा फायनान्स विषयात पदव्युत्तर पदवी किंवा पीजीडीएम/एमबीए केलेलं असणं आवश्यक आहे.
-ऑफिसर ग्रेड बी डीएसआयएमसाठी गणित किंवा संख्याशास्त्र विषयात पोस्ट ग्रॅज्युएशन झालेले उमेदवार पात्र ठरतील.
वयोमर्यादा आणि शुल्क
उमेदवारांचे वय 21 ते 30 वर्षे दरम्यान असणे आवश्यक आहे. खुला, ओबीसी आणि ईडब्ल्यूएस प्रवर्गातील उमेदवारांसाठी अर्ज शुल्क 850 रुपये निश्चित करण्यात आले आहे. तर एससी, एसटी आणि दिव्यांग उमेदवारांसाठी अर्ज शुल्क 100 रुपये आहे. याशिवाय सर्व प्रवर्गातील उमेदवारांना जीएसटी भरावा लागणार आहे.
अर्ज करण्याची पद्धत
या भरतीसाठी इच्छुक उमेदवारांनी RBI च्या अधिकृत वेबसाईट opportunities.rbi.org.in वर जाऊन अर्ज करावा. ऑनलाईन नोंदणी करून आवश्यक कागदपत्रं अपलोड करावी आणि शुल्क भरून अर्ज प्रक्रिया पूर्ण करावी. अर्ज भरल्यानंतर त्याची प्रिंटआऊट काढून ठेवण्याचा सल्ला देण्यात आला आहे.
वेतनश्रेणी आणि सुविधा
या पदावर निवड झालेल्या उमेदवारांना दरमहा 78,450 रुपये मूळ वेतन मिळेल. ग्रेड पे स्केल 78,540-400(9)-114,900-EB-4050(2)-123,000-4650(4)-141,600 या प्रमाणे वेतन दिलं जाणार आहे. इतर भत्त्यांसह साधारणपणे दीड लाख रुपये पगार मिळेल. बँकेकडून निवासस्थान उपलब्ध न झाल्यास घरभाडे भत्ता देखील मिळणार आहे.
निवड प्रक्रिया
उमेदवारांची निवड तीन टप्प्यांत केली जाणार आहे. पहिल्या दोन टप्प्यात ऑनलाईन लेखी परीक्षा घेतली जाईल आणि त्यानंतर मुलाखत होईल. खुल्या आणि ईडब्ल्यूएस प्रवर्गातील उमेदवारांना कमाल सहा वेळा परीक्षा देण्याची संधी आहे. तर इतर प्रवर्गातील उमेदवारांसाठी परीक्षेच्या प्रयत्नांची मर्यादा ठेवलेली नाही.
