स्टेट बँक ऑफ इंडियाने (SBI) स्पेशलिस्ट कॅडर ऑफिसर (SCO) पदांसाठी मोठी भरती (Bank Job) जाहीर केली आहे. या भरती मोहिमेद्वारे एकूण 103 पदे भरली (Bank Bharti) जाणार आहेत. विशेष म्हणजे या भरतीसाठी कोणतीही लेखी परीक्षा होणार नाही, तर उमेदवारांची निवड केवळ शॉर्टलिस्टिंग आणि मुलाखतीच्या आधारे केली जाणार आहे. इच्छुक उमेदवारांना 17 नोव्हेंबर 2025 पर्यंत एसबीआयच्या या sbi.bank.in अधिकृत संकेतस्थळावर अर्ज करता येईल.
एसबीआयच्या अधिसूचनेनुसार, भरल्या जाणाऱ्या 103 पदांमध्ये एक प्रमुख (उत्पादन, गुंतवणूक आणि संशोधन), चार झोनल प्रमुख (रिटेल), सात प्रादेशिक प्रमुख, 19 रिलेशनशिप मॅनेजर/टीम लीड्स, 22 इन्व्हेस्टमेंट स्पेशलिस्ट (IS), 46 इन्व्हेस्टमेंट ऑफिसर (IO), दोन प्रोजेक्ट डेव्हलपमेंट मॅनेजर (व्यवसाय) आणि दोन सेंट्रल रिसर्च टीम (सपोर्ट) पदांचा समावेश आहे.
शैक्षणिक पात्रतेनुसार, प्रमुख पदासाठी CA, CFA, CFP किंवा NISM प्रमाणपत्रासह बॅचलर किंवा मास्टर डिग्री आवश्यक आहे. झोनल आणि रीजनल हेड तसेच रिलेशनशिप मॅनेजर पदांसाठी पदवीधर पात्रता आवश्यक आहे. इन्व्हेस्टमेंट स्पेशालिस्ट आणि ऑफिसर पदांसाठी फायनान्स, कॉमर्स, बँकिंग किंवा बिझनेस मॅनेजमेंटमध्ये पदव्युत्तर पदवी, डिप्लोमा किंवा CA/CFA पात्रता आवश्यक आहे. प्रोजेक्ट डेव्हलपमेंट मॅनेजर पदासाठी MBA किंवा PGDM आवश्यक असून, सेंट्रल रिसर्च टीम पदासाठी कॉमर्स, गणित किंवा मॅनेजमेंट विषयातील बॅचलर डिग्री आवश्यक आहे.
वयोमर्यादा पदानुसार वेगवेगळी आहे. प्रमुख, झोनल आणि रीजनल हेडसाठी वयोमर्यादा 35 ते 50 वर्षे, रिलेशनशिप मॅनेजर आणि इन्व्हेस्टमेंट स्पेशालिस्टसाठी 28 ते 42 वर्षे, इन्व्हेस्टमेंट ऑफिसरसाठी 28 ते 40 वर्षे, प्रोजेक्ट डेव्हलपमेंट मॅनेजरसाठी 30 ते 40 वर्षे आणि सेंट्रल रिसर्च टीमसाठी 25 ते 35 वर्षे निश्चित करण्यात आली आहे.
अर्ज शुल्क सामान्य, ओबीसी आणि ईडब्ल्यूएस उमेदवारांसाठी 750 रुपये असून, एससी, एसटी आणि पीडब्ल्यूबीडी उमेदवारांना शुल्कातून सूट देण्यात आली आहे. निवड प्रक्रियेत कोणतीही लेखी परीक्षा नसेल. उमेदवारांची निवड 100 गुणांच्या मुलाखतीच्या आधारे केली जाईल. मुलाखत प्रत्यक्ष, फोनवर किंवा व्हिडिओ कॉन्फरन्सिंगद्वारे घेतली जाऊ शकते. अंतिम निकाल गुणवत्ता यादी आणि मुलाखतीतील गुणांवर आधारित असेल.
अर्ज करण्यासाठी उमेदवारांनी sbi.bank.in वर जाऊन “Career” विभागात “SCO Recruitment 2025” या लिंकवर क्लिक करावे, आवश्यक माहिती भरावी, कागदपत्रे अपलोड करून शुल्क भरावे आणि फॉर्म सबमिट करावा. अर्जाची प्रिंट कॉपी स्वतःकडे ठेवावी.
