Rupali Thombare : राष्ट्रवादी काँग्रेसमध्ये पुन्हा एकदा राजकीय भूकंप झाला आहे. उपमुख्यमंत्री अजित पवार यांनी पक्षाच्या प्रवक्त्यांच्या यादीत मोठा बदल करत रूपाली पाटील ठोंबरे (Rupali Patil Thombare) आणि आमदार अमोल मिटकरी (Amol Mitkari) यांना बाहेरचा रस्ता दाखवला आहे. गेल्या काही दिवसांपासून या दोघांनी केलेल्या वादग्रस्त विधानांमुळे पक्षावर दबाव वाढला होता, आणि अखेर अजित पवारांनी (NCP Ajit Pawar) कठोर पाऊल उचलले आहे.
फलटण येथील डॉक्टर तरुणीच्या आत्महत्येच्या प्रकरणावरून रूपाली पाटील ठोंबरे यांनी राज्य महिला आयोगाच्या अध्यक्षा रूपाली चाकणकर यांच्यावर थेट टीका केली होती. यामुळे पक्षात मोठा गदारोळ झाला. पक्षाने त्यांना कारणे दाखवा नोटीस पाठवून स्पष्टीकरण मागितले होते. शनिवारीच ठोंबरे यांनी अजित पवार यांची भेट घेऊन स्पष्टीकरण दिलं, मात्र काही तासांतच त्यांची प्रवक्तेपदावरून हकालपट्टी करण्यात आली.
अमोल मिटकरी यांच्यावरील कारवाईही अपेक्षित होती. त्यांनी मागील काही दिवसांत भाजपविरोधी आणि महायुतीला अस्वस्थ करणारी विधानं केली होती. पक्षाच्या शिस्तीच्या चौकटीत न बसणारे वर्तन पाहता त्यांनाही पदावरून हटवण्यात आलं आहे. दरम्यान, या नव्या प्रवक्त्यांच्या यादीत सूरज चव्हाण यांचं पुनरागमन झालं आहे. काही महिन्यांपूर्वी मारहाण प्रकरणामुळे त्यांना पदावरून दूर केलं गेलं होतं, मात्र आता त्यांना पुन्हा प्रवक्तेपदी नेमण्यात आलं आहे. या घडामोडींमुळे राष्ट्रवादी काँग्रेसमध्ये चर्चांना उधाण आलं आहे.
रुपाली ठोंबरे फेसबुकवर पोस्ट शेअर करत म्हणाल्या,
“नमस्कार जय महाराष्ट्र. मी सध्या पुण्याबाहेर प्रवासात आहे, त्यामुळे संपर्क होऊ शकला नाही. पक्षाने नव्या प्रवक्त्यांची यादी जाहीर केली आहे, त्यात माझं आणि आमदार अमोल मिटकरी यांचं नाव नाही. आम्ही येणाऱ्या निवडणुकांसाठी पूर्ण तयारीत आहोत आणि पक्षाचं काम जोमाने करत राहू. अजित पवार यांची भेट घेऊन या निर्णयाबाबत चर्चा करेन.”
