पंढरपूर वारीचा शुभमुहूर्त, लाखो भाविकांची विठ्ठलभक्ती आणि श्रद्धेचा सागर याला समर्पित असलेलं एक नवं भक्तिगीत नुकतंच रसिकांच्या भेटीला आलं आहे. “ओढ तुझ्या पंढरीची” असं या गीताचं शीर्षक असून, हे माऊली म्युझिक कंपनीच्या वतीने प्रदर्शित झालेलं त्यांचं पहिलं गाणं आहे. सुप्रसिद्ध गायक अजय गोगावले यांच्या प्रभावी आवाजात हे गीत सादर करण्यात आलं आहे.

कलात्मक सादरीकरण आणि भावस्पर्शी संगीत
या गीताला नितीन उगलमुगले यांनी संगीतबद्ध केलं असून, मुकुंद भालेराव यांनी गीतलेखन केलं आहे. गाण्याच्या शीर्षक ओळीचे श्रेय अपूर्व राजपूत यांना जातं. गीताचं दिग्दर्शन पवन लोणकर यांनी केलं असून, संगीत संयोजन पद्मनाभ गायकवाड, ध्वनिमुद्रण व मिश्रण विनायक पवार यांचे आहे. तर संपादन (एडिटिंग) धीरज भापकर यांनी केलं आहे. हे गाणं ३४० व्या पालखी प्रस्थानाच्या दिवशी प्रदर्शित झालं असून, त्याला रसिकांकडून प्रचंड प्रतिसाद मिळत आहे. युट्यूबसह विविध डिजिटल प्लॅटफॉर्म्सवर हे गाणं लोकप्रियतेच्या शिखराकडे झपाट्याने वाटचाल करत आहे.
वारकऱ्यांच्या मनातील ओढ व्यक्त करणारी संकल्पना
संगीतकार नितीन उगलमुगले सांगतात, “आम्ही याआधी ‘मायबापा विठ्ठला’ हे भक्तिगीत सादर केलं होतं आणि त्याला भरभरून प्रेम मिळालं. त्या यशातून प्रेरणा घेऊन मी, मुकुंद भालेराव आणि पवन लोणकर – आम्ही ‘माऊली म्युझिक कंपनी’ सुरू केली. आमची पार्श्वभूमी ही वारकरी संस्कृतीशी जोडलेली असल्यामुळे भक्तिगीतं हा आमच्या संगीत प्रवासाचा केंद्रबिंदू असणार आहे.” “‘ओढ तुझ्या पंढरीची’ हे आमचं पहिलं गाणं अजयदादांच्या आवाजात साकार झालं आणि त्याला मिळालेला प्रतिसाद आमच्यासाठी फारच उत्साहवर्धक आहे,” असंही ते नमूद करतात.

भक्तीचा अनुभव नव्या पिढीपर्यंत
या गीतामधून वारीतील चालती श्रद्धा, विठ्ठल भेटीची तळमळ आणि वारकऱ्यांच्या मनातील ओढ – हे सगळं प्रामाणिकपणे प्रेक्षकांसमोर मांडण्यात आलं आहे. माऊली म्युझिक कंपनी लवकरच आणखी भक्तिगीतं व भावस्पर्शी संगीत प्रकल्प घेऊन येणार आहे. “आमचा उद्देश असा आहे की, भक्ती आणि सांस्कृतिक संगीत नव्या पिढीपर्यंत पोहोचवावं, नवोदित कलाकारांना संधी द्यावी आणि पारंपरिक संगीत नव्या स्वरूपात सादर करावं,” असंही उगलमुगले यांनी सांगितलं. “ओढ तुझ्या पंढरीची” हे गाणं विठ्ठल भक्तीमध्ये रंगून जाणाऱ्यांसाठी एक अनोखा, आत्मिक आणि अध्यात्मिक अनुभव देणारं गीत ठरत आहे. युट्यूबसह सर्व डिजिटल प्लॅटफॉर्म्सवर हे गीत पाहता आणि ऐकता येऊ शकतं.







