Bhoot Bangla trailer : अभिनेता अक्षय कुमारच्या आगामी ‘भूत बंगला’ या चित्रपटाचा ट्रेलर नुकताच प्रदर्शित झाला असून प्रेक्षकांमध्ये याची मोठी चर्चा सुरू झाली आहे. हॉरर आणि कॉमेडीचा मिलाफ असलेल्या या चित्रपटात भीतीसोबत विनोदाचाही अनुभव मिळणार असल्याचे ट्रेलरमधून स्पष्ट होते.
ट्रेलरमध्ये एक जुना आणि मोठा बंगला दाखवण्यात आला आहे, जो अनेक रहस्यांनी भरलेला दिसतो. या बंगल्याशी संबंधित एक वधूसुर असल्याची गोष्ट सांगितली जाते, जो नष्ट झाला नसून अधिक शक्तिशाली झाल्याचे दाखवले आहे. त्यामुळे त्याला पुन्हा जिवंत करण्याचा प्रयत्न सुरू असल्याचे संकेत मिळतात. या सगळ्या घडामोडींमुळे बंगल्यात आणि त्याच्या परिसरात विचित्र आणि भीतीदायक घटना घडताना दिसतात.
चित्रपटात अक्षय कुमारला हा बंगला वारशाने मिळाल्याचे दाखवले आहे. बंगल्याच्या मागे पिशाच वन नावाचे जंगल असून तिथे भूतांचा वावर असल्याची चर्चा आहे. त्याला हे ठिकाण सोडून जाण्यासाठी अनेक इशारे दिले जातात, पण तो तिथेच राहण्याचा निर्णय घेतो. मोठा बंगला सोडून जाणार नाही, असा त्याचा ठाम स्वभाव ट्रेलरमध्ये दिसून येतो.
या चित्रपटात वामिका गब्बीचे पात्रही महत्त्वाचे असून तिला या बंगल्याबद्दल कुतूहल वाटत असल्याचे दाखवले आहे. तसेच परेश रावल, राजपाल यादव आणि असरानी यांची उपस्थिती ट्रेलरमध्ये पाहायला मिळते, ज्यामुळे अनेक प्रसंगात विनोदाची रंगत वाढते. काही दृश्ये भीती निर्माण करतात, तर काही संवाद हसवतात.
ट्रेलरमध्ये पुढे या बंगल्यात लग्न करण्याचा निर्णय घेतल्याचे दाखवले आहे. मात्र इथे लग्न केल्यास वधूसुर येईल, अशी चेतावणी दिली जाते. त्यामुळे कथा पुढे कशी उलगडते याबद्दल प्रेक्षकांची उत्सुकता वाढली आहे. हा चित्रपट लवकरच प्रेक्षकांच्या भेटीला येणार आहे.
