Aamir Khan : बॉलिवूडचा मिस्टर परफेक्शनिस्ट आमिर खान लवकरच रुपेरी पडद्यावर कमबॅक करण्यासाठी सज्ज आहे. अनेक दिवसांपासून तो रुपेरी पडद्यापासून दूर आहे. ‘लाल सिंह चड्ढा’ या सिनेमात शेवटचा दिसला होता. पण 2024 मध्ये तो धमाकेदार कमबॅक करणार असल्याचं समोर येत आहे. जानेवारीपासून तो त्याच्या आगामी सिनेमाचं शूटिंग सुरू करणार आहे.
करीना कपूर अभिनीत ‘लाल सिंह चड्ढा’ या सिनेमा रुपेरी पडद्यावर फ्लॉप ठरला होता. त्यानंतर त्याने सिनेसृष्टीपासून ब्रेक घेण्याचा निर्णय घेतला. 2023 मध्ये आमिरचा एकही सिनेमा प्रदर्शित झाला नाही. आमिरला मोठ्या पडद्यावर पाहण्यासाठी चाहते उत्सुक होते. पण आता नव्या वर्षाच्या सुरुवातीलाच आमिर सिनेसृष्टीत धमाकेदार कमबॅक करण्याची तयारी करत आहे.
मीडिया रिपोर्टनुसार, आमिर खानच्या आगामी सिनेमाचं शूटिंग जानेवारी महिन्यात सुरू होणार आहे मुंबईत या सिनेमाच्या शूटचं पहिलं शेड्यूल पार पडणार आहे. एसआर प्रसन्ना या सिनेमाच्या दिग्दर्शनाची धुरा सांभाळणार आहेत. सध्या या सिनेमाच्या प्री-प्रोडक्शनचं काम सुरू आहे. प्री-प्रोडक्शनचं काम पूर्ण झाल्यानंतर निर्माते 29 जानेवारीपासून या सिनेमाच्या शूटिंगला सुरुवात करू शकतात.
आमिर खानचा आगामी सिनेमा हा 2018 मध्ये आलेला स्पॅनिश सिनेमा ‘कैम्पियन्स’चा रिमेक आहे. आमिर खानदेखील या सिनेमासाठी खूप उत्सुक आहे. एका रागिट प्रशिक्षकावर आधारित हा सिनेमा आहे. गतीमंद मंडळींना एकत्र करुन एक टीम बनवणाऱ्या क्रीडा प्रशिक्षकाची गोष्ट या सिनेमात दाखवण्यात येणार आहे. या सिनेमाचं कास्टिंग खूप महत्त्वाचं असणार आहे. या सिनेमात आमिर खान मुख्य भूमिकेत झळकणार आहे. या सिनेमासाठी योग्य कलाकारांची निवड करण्यासाठी अनेकांची ऑडिशन घेण्यात येणार आहे.
