नवी दिल्ली: देशभरात ९ जुलै रोजी ‘भारत बंद’ची हाक देण्यात आली असून, २५ कोटींपेक्षा अधिक कर्मचारी संपात सहभागी होण्याची शक्यता वर्तवली जात आहे. बँकिंग, विमा, पोस्ट सेवा, कोळसा खाणी आणि वाहतूक यांसारख्या विविध क्षेत्रांतील कामगार या संपात सहभागी होणार आहेत. परिणामी, काही सेवा विस्कळीत होण्याची शक्यता वर्तवली जात असली, तरी शेअर बाजारावर याचा कसलाही परिणाम होणार नाही, असे स्पष्ट झाले आहे.

NSE-BSE मध्ये व्यवहार सुरळीत
देशातील प्रमुख शेअर बाजार नॅशनल स्टॉक एक्सचेंज (NSE) आणि बॉम्बे स्टॉक एक्सचेंज (BSE) यांनी ९ जुलै या दिवशी कोणतीही अधिकृत सुटी घोषित केलेली नाही. त्यामुळे सर्व व्यवहार नियोजित वेळेनुसार सुरू राहतील.
इक्विटी, डेरिव्हेटिव्ह्ज, करन्सी मार्केट, SLB आणि इलेक्ट्रॉनिक गोल्ड रिसीट्स (EGR) या सर्व सेगमेंटमध्ये नियमित व्यवहार होणार आहेत.
NSE च्या सुटीच्या यादीत ९ जुलैचा समावेश नसल्याने, तो सामान्य व्यावहार दिवस असणार आहे.

NSE चा सुटीचा कॅलेंडर आणि वेळापत्रक
NSE दरवर्षी सुरुवातीलाच वर्षभरातील सुट्ट्यांचे अधिकृत वेळापत्रक जाहीर करते. २०२५ मध्ये NSE ने १४ अधिकृत सुट्या घोषित केल्या आहेत. याशिवाय, शनिवार आणि रविवार बाजार बंद असतो. कोणतीही विशेष सुटी असल्यास, स्वतंत्र नोटीसद्वारे माहिती दिली जाते. सध्या ९ जुलैसाठी अशी कोणतीही नोटीस जारी करण्यात आलेली नाही.
त्यामुळे ९ जुलै २०२५ ला शेअर बाजार नियमितपणे सुरू राहणार आहे. भारत बंदमुळे बँकिंग, पोस्ट किंवा वाहतूक, सेवा विस्कळीत होऊ शकतात, मात्र NSE-BSE वर कोणताही परिणाम होणार नाही.







