पुणे: प्राप्तिकर विभागाकडे आयकर परतावा (ITR) भरण्याची अंतिम तारीख 31 जुलै जवळ येत असल्याने करदात्यांसाठी वेळेत रिटर्न भरणे अत्यावश्यक झाले आहे. ज्यांनी अद्याप आयटीआर भरलेला नाही, त्यांनी शेवटच्या क्षणाची वाट न पाहता ही प्रक्रिया पूर्ण करावी. विलंब झाल्यास दंड, व्याज किंवा प्राप्तिकर विभागाकडून नोटीस मिळण्याची शक्यता नाकारता येत नाही.
यंदाच्या नवीन कर व्यवस्थेनुसार नोकरदारांना 75 हजार रुपयांच्या स्टँडर्ड डिडक्शनचा लाभ मिळत असून, त्यानंतर ठराविक अटी पूर्ण झाल्यास 12.75 लाख रुपयांपर्यंतच्या उत्पन्नावर करसवलत मिळू शकते. मात्र, ही मर्यादा सर्व प्रकारच्या उत्पन्नावर लागू होते, असा अनेकांचा गैरसमज आहे. प्रत्यक्षात कलम 87A अंतर्गत मिळणारी करसवलत केवळ पात्र उत्पन्नावरच लागू होते.
पगाराशिवाय इतर माध्यमांतून कमाई करणाऱ्या करदात्यांनी विशेष काळजी घेणे आवश्यक आहे. शेअर बाजारातील शॉर्ट टर्म कॅपिटल गेन (STCG), लाँग टर्म कॅपिटल गेन (LTCG) तसेच ऑनलाइन गेमिंग, लॉटरी किंवा घोड्यांच्या शर्यतीमधून मिळणाऱ्या उत्पन्नावर स्वतंत्र कर नियम लागू होतात. अशा उत्पन्नावर संबंधित कायद्यांनुसार कर आणि आवश्यकतेनुसार TDS देखील आकारला जातो. त्यामुळे वार्षिक उत्पन्न 12.75 लाख रुपयांपेक्षा कमी असले, तरी अशा कमाईवर कर भरावा लागू शकतो.
