नवी दिल्ली: केंद्र सरकारकडून आठव्या वेतन आयोगाच्या संदर्भात समिती स्थापन करण्यात आली आहे. आयोगासाठी स्थापन करण्यात आलेल्या समितीला 18 महिन्यांच्या आत अहवाल सादर करण्याचे निर्देश देण्यात आले आहेत. अहवाल वेळेवर सादर झाल्यास कर्मचाऱ्यांच्या पगार आणि पेन्शनमध्ये लवकरच वाढ होण्याची शक्यता व्यक्त केली जात आहे.
समितीत कोणाचा समावेश? (8 th Pay Commission Update)
आयोगाचे अध्यक्षपद न्यायमूर्ती रंजन प्रकाश देसाई यांच्याकडे सोपवण्यात आले असून, प्राध्यापक पुलक घोष हे अर्धवेळ अर्थतज्ज्ञ सदस्य म्हणून कार्यरत असणार आहेत. तसेच पंकज जैन हे सचिव पदाची जबाबदारी सांभाळणार आहेत.
कधी लागू होणार ? (8 th Pay Commission Update)
आठवा वेतन आयोग 1 जानेवारी 2026 पासून लागू होण्याची शक्यता आहे. पगारवाढीचा लाभ मिळण्यास काही महिने विलंब होऊ शकतो, मात्र कर्मचाऱ्यांना एरिअरच्या स्वरूपात त्याचा फायदा दिला जाईल.
किती होणार पगारवाढ?
सरकारी कर्मचाऱ्यांच्या पगार आणि पेन्शनमध्ये किती वाढ होणार याबाबतच्या चर्चा नोकरदार वर्गात होत आहेत. मागील ट्रेंडनुसार, पगार आणि पेन्शनमध्ये 30 ते 34 टक्क्यांपर्यंत वाढ होण्याची शक्यता व्यक्त केली जात आहे.
या वाढीमुळे देशातील लाखो केंद्र आणि राज्य सरकारी कर्मचाऱ्यांना मोठा आर्थिक दिलासा मिळणार आहे. आठव्या वेतन आयोगाचा अहवाल वेळेत सादर झाल्यास, 2026 च्या सुरुवातीला ही वाढ अंमलात येण्याची अपेक्षा आहे.
