पुणे : दारु पिण्यासाठी पैसे न दिल्याने तरुणाच्या तोंडावर दगडाने ठेचून त्याला जीवे मारण्याचा प्रयत्न केल्याची धक्कदायक घटना उघडकीस आली आहे. याप्रकणी येरवडा पोलीस ठाण्यात फिर्याद देण्यात आली आहे. त्यानुसार पोलिसांनी दोन जणांना अटक केली आहे.
सचिन रिको लुंकड (वय २०), आणि नंदकुमार संजय पासंगे (वय २०, दोघे रा. कामगारनगर, येरवडा) असे अटक करण्यात आलेल्या आरोपींची नावी आहेत. सचिन किसन गायकवाड असे जखमी झालेल्या व्यक्तीचे नाव आहे. तर, नितीन किसन गायकवाड (वय ३३, रा. कामगारनगर, येरवडा) असे फिर्याद दिलेल्या व्यक्तीचे नाव आहे.
पोलिसांनी दिलेल्या माहितीनुसार, सचिन लुंकड हा सराईत गुन्हेगार असून त्याच्याविरुद्ध घरफोडी व हत्यार बाळगणे असे दोन गुन्हे यापूर्वी दाखल आहेत. सचिन गायकवाड हा लघुशंका करण्यासाठी घराबाहेर गेला असताना त्यांच्या वस्तीतील गुंड सचिन लुंकड व पासंगे यांनी त्यास दारु पिण्यासाठी पैसे मागितले. सचिन गायकवाड याने पैसे देण्यास नकार दिला. त्यामुळे दोघांनी शिवीगाळ करुन त्याच्या तोंडावर दगडाने ठेचून लाथाबुक्क्यांनी मारहाण करुन गंभीर जखमी केले.
त्यानंतर फिर्यादी नितीन भावाला सोडविण्यासाठी गेले असता त्यांना लुंकड याने तलवार बाहेर काढून मध्ये आला तर खल्लास करुन टाकेल, अशी धमकी दिली. तसेच इतरांच्या दिशेने तलवार फिरवून दहशत निर्माण केली. यानंतर नितीन गायकवाड याने येरवडा पोलीस ठाण्यात फिर्याद दिली. दोन्ही आरोपींना पोलिसांनी अटक केली आहे. या घटनेचा पुढील तपास पोलीस करीत आहे.
